یونس عزیز زہری اِرا قیدی کن دیت تس، جیل آن یلہ کننگار

خضدار : بلوچستان اسمبلی نا باسک میر یونس عزیز زہری اِرا بندی نا دیت ءِ ترسا اوفتے جیل آن یلہ کرفے‘80سال انا پیر انگا بندغ و اونا مار 17سال آن جیل اٹ سزا کنگرہ وخت اس کہ گدرینگوک آ کیہی تُو آن دیت تفننگ ناسوب آن یلہ مننگ کتوسہ‘ دیت تننگ آن پد اوفتے یلہ کننگا۔ حوال نا رد اٹ دیت تننگ آن پد 17سال آن جیل اٹ بند اِرا بندی ءِ یلہ کننگا‘ انجمن تاجران خضدار نا صدر حافظ حمیداللہ مینگل سینٹرل جیل خضدار نا گیٹ آ بندی تے ریسیو کرے و اوفتے جیل آن یلہ مننگ آ مبارکبادی تس و اُراتیا راہی کرفگے‘ سینٹرل جیل انا سپرنٹنڈنٹ سعد کاکڑ وایلو کارندہ غاک ہم داوخت آساڑی ئسر۔ بلوچستان نا رہینگوک دا ہڑتوم آبندیک مار باوہ ئسر و باوہ نا وئی ہچ مف 80سال آن بڑزا و بھاز پیر ءِ و 2007 آن جیل اٹی ئس‘ گدرینگوک آ منہ تُو آن او سزا پورو مننگ آن پد دیت تفننگ ناسوب آن یلہ مننگ کتویسس۔ جمعیت علماء اسلام نا بنجائی راہشون و بلوچستان اسمبلی نا باسک میر یونس عزیز زہری تینا جیب آ لکھ آ روپئی تے ترسا بندی تے یلہ کرفے۔ داکان بیدس انجمن تاجران خضدارنا صدر حافظ حمیداللہ مینگل سپرنٹنڈنٹ سینٹرل سینٹرل جیل خضدار سعد کاکڑ تون اونادفتر اٹ اوڑدہی کرے۔

(خ ن)