کورونا نا سوب آن بلوچستان نا نجی تعلیمی ادارہ غاک بند مننگ نا دنگ آ سر مسر

کوئٹہ (آن لائن) بلوچستان پرائیویٹ اسکولز گرینڈ الائنس ناعہدیدار آک پارینو کہ اسکول آتا چابی تے مرحلہ وار وزیراعلیٰ ہاﺅس اٹ جمع کننگک‘ کورونا ناسوب آن بلوچستان نانجی تعلیمی ادارہ غاتا بند مننگ آن ادارہ غاک مالی مشکل آتا گواچی ءُ۔ دا خیال آتا درشانی ءِ پرائیویٹ اسکول نا ترجمان نظر بڑیچ تینا سنگت آتون اوار کوئٹہ پریس کلب اٹ پریس کانفرنس آن تران کرسا کرے۔ او پارے کہ بلوچستان پرائیویٹ گرینڈ الائنس مرحلہ وار اسکول آتا چابی تے وزیراعلیٰ ہاﺅس اٹ جمع کرفنگک۔ او پارے کہ 28 سَد آن زیات تعلیمی ادرہ غاتے ٹی خوانوک 8لکھ آن زیات چنا‘ 50 ہزار نا کچ استاد وایلو کارندہ غاک زہمی مننگ اٹی ءُ‘ اگہ نجی اسکول انتظامیہ تون کمک کننگتو تو آخبت اٹ بلوچستان ومچ آ ملک بے روزگاری و جہالت ناسوب آن کورونا غان زیات دَین آن زہمی مریک۔ تینا مشکل آتیان صوبہ نا غٹ بڑزکو کمامدار آتے معلومدار کرینن ولے ننا ویل آ ہچ چکار کپننگ انگ ءِ ننا تعلیمی ادارہ غاک نان کمرشل ءُ ہرا اسکول آتا فیس تیان چلینگرہ‘ حکومت غٹ نجی اسکول آتا یوٹیلٹی بل و خراج آتے بشخنگ نا پرمان کرے۔ بلوچستان پرائیویٹ اسکولز گرینڈ الائنس نجی تعلیمی ادارہ غاتیکن گرانٹ ان ایڈ تننگ نا خواست کیک‘ گرانٹ ان ایڈ آن کارندہ غاتا تنخواہ‘ اسکول نا ماڑی نا کرا و ایلو خڑچ آتے پورو کننگک۔