الس کورونا وائرس آن بچنگ کن تینا اُرا تیٹی رہینگ ءِ اولیت ایتے، شبیر مینگل
اگہ الس کمک کرے تو حکومتی گام گیج آتا کمک اٹ کورونا وائرس نا زُوت مون ءِ تورنہ، ڈسٹرکٹ ہیلتھ آفیسر لورالائی
Get real time updates directly on you device, subscribe now.
لورالائی (خ ن) ڈسٹرکٹ ہیلتھ آفیسر لورالائی ڈاکٹرشبیراحمد مینگل پارینے کہ الس کورونا غان بچنگ کن تینا اُراتے ٹی مننگ ءِ اولیت ایتے‘ انشاءاللہ ہمو دے ہم بریک ہراتم الس نا کمک و حکومتی گام گیج آتا سوب آن کورونا نا مون ءِ تورک‘ صوبائی حکومت کورنا نا چٹفنگ و بندغ آتے داڑان رکھنگ کن اولیتی بنداو آ گام گیج کننگ اٹی ءِ۔ دا خیال آتادرشانی ءِ او ڈی ایچ کیو ہسپتال ایم ایس ڈاکٹر عبدالواحد بلوچ نا دفتر اٹ کمشنر ژوب ڈویژن نا کنڈآن تروک رکھی کٹ تننگ ناوخت آ کرے۔دا وخت آ ڈاکٹر منیر اقبال، ڈاکٹر جہانگیر، ڈاکٹر نجم الدین، ڈاکٹرمحب اللہ خان، اسٹاف آفیسر و ڈویژنل فوکل پرسن برائے کویڈ 19ڈاکٹر فرحان انجم وایلو پیرامیڈکس اسٹاف ساڑی ئس۔او پارے کہ کورونا ترندی اٹ تالان مننگ اٹی ءِ دا وخت اسکان دونیم سَد آن زیات ملک آتے زہمی کرینے دانا توننگ و چٹفنگ بیرہ وبیرہ رکھی گام گیج آتیا عملدرآمد کننگ ءِ‘داڑکن الس رکھی گام گیج آتیا عمل کننگ ءِ پک کے و کورونا غان بچنگ کن تینا اُراتے ٹی مننگ ءِ اولیت ایتے۔ او پارے کہ ڈی ایچ کیو ہسپتال لورالائی، ریزیڈیشنل کالجز لورالائی، میڈیکل کالج و تحصیل ہیڈ کواٹر میڈیکل ہسپتال میختر اٹ آئسولیشن سینٹر جوڑ کننگانے ہراڑے ڈاکٹر، نرسنگ، پیرا میڈیکس وایلو تعلقدار کمامدار آک دے ونن الس نا خذمت ءِ کننگ اٹی ءُ۔