ریکوڈک معاہدہ غا دستخط، بلوچستان شونداری نا ہند جوڑ مریک، قدوس بزنجو

اسلام آباد (آن لائن) وزیراعلیٰ میر عبدالقدوس بزنجو و بیرک گولڈ کمپنی نا صدر مسٹر مارک برسٹو ریکوڈک نا بابت پوسکن آ معاہدہ غا دستخط کرینو، تدوک آ دے بلوچستان حکومت خیسن و مِس انا ارب آ ڈالر مالیت نا ریکوڈک ڈٹ آ پوسکن ءُ معاہدہ و سیٹلمنٹ اسے نا منظوری ءِ تسوسس۔ معاہدہ غا دستخط آن پد میر عبدالقدوس بزنجو و مسٹر مارک برسٹو نا اوڑدہی اس مس، ہراٹی آخبت نا لائحہ عمل آ ہیت کننگا، میر عبدالقدوس بزنجو پارے کہ بلوچستان داسہ انسرجنسی نا آخا بلکہ زرکاری و شونداری نا ہند اس جوڑ مریک۔ ریکوڈک آ فیصلہ ءِ دہ سال پد بٹنگ آن زرکار و ننا چین تے نسخان رسینگا، داسہ ہشت ہزار ملازمت نا کسر ملنگک، وزیراعظم، آرمی چیف و بنجائی وزیر خزانہ نا منتوار کہ اوفک ننا خرین آ ہیت آتے ہم سگار، بیرک گولڈ کمپنی نا صدر پارے کہ مستین ءِ گیرام کرسا آخبت نا کنڈ آن جوان ءُ سفر اسے نا بنا ءِ کننگ اٹی اُن۔ پتداری نا چاگڑد ءِ بحال کرسا ہیت و گپ نا بناءِ کرین، پوسکن آ معاہدہ ٹی بلوچستان نا الس نا فائدہ و ورنا تا روزگار نا رکھ ءِ کینہ۔ معاہدہ غان پد بنجائی وزیرخزانہ شوکت ترین وزیر توانائی حماد اظہر و وزیراعلیٰ بلوچستان عبدالقدوس بزنجو تون اوار اسیجا پریس کانفرنس کرسا پارے کہ 2011ء ٹی عدالت عظمیٰ ریکوڈک معاہدہ ءِ چٹفیسس۔ ہراڑا معاملہ جہانی خیرخواہی عدالت اٹ ہنا۔ انٹرنیشنل کورٹ آف آربیٹریشن پاکستان آ کم و وَد 6.4 ارب ڈالر نا ڈنڈ بیٹ کرے، داڑتون اوار لندن کورٹ آف آربیٹریشن اٹی ہم پاکستان نا برخلاف چار و نیم ارب ڈالر ڈنڈ بیٹ مروئی ئسکہ۔ وزیرخزانہ پارے کہ وزیراعظم عمران خان 2019 ء اٹی جارحانہ وڑ اٹی دا معاملہ ءِ سر تننگ نا کوشست نا بنا مس۔ وزیراعظم اسہ اپیکس باڈی اس جوڑ کرے، ہرا بھاز خواری کرے، و چلی نا کمپنی انٹوپگاسٹا تون 950 ملین ڈالر آ معاہدہ مس۔ دا کمپنی 3.25 ارب ڈالر نا کلیم ءِ پدی ہلک، دا کمپنی داسہ ریکوڈک اٹی اوار اف۔ او پارے کہ ایون ہرا معاہدہ غا دستخط مس، اوٹی کینیڈین کمپنی بیرک گولڈ نا بشخ 50 درسد مریک۔ بلوچستان نا حکومت نا بشخ 25 درسد ءِ۔ وزیر خزانہ پارے کہ اینو نا معاہدہ غان نئے بیرہ 11 ارب ڈالر نا ڈنڈ چٹانے، بلکہ داسہ بیرک گولڈ و اونا شریدار کمپنیک دہ ارب ڈالر آن زیات زرکاری کیرہ، ہراڑان بلوچستان اٹی ملازمت نا ہشت ہزار وارخواہی ودی مریرہ و پاکستان ءِ بے کچ فائدہ مریک۔ او پارے کہ معاہدہ غان انکم فلو100 ارب ڈالر آن زیات ءِ۔ داڑان بنجائی و صوبائی حکومت آتے خراج نا ر داٹ بے کچ بھلو ریونیو اس دوئی مریک۔