فوج انا ورناک دہشت گردی، انتہاپسندی نا چٹفنگ کن بے مٹ قربانی تسنو، زبیدہ جلال

کوئٹہ(اے پی پی) بنجائی وزیر دفاعی پیداوار گودی زبیدہ جلال پارینے کہ پاک فوج انا ورناک ملک اٹی دہشت گردی ، انتہاپسندی نا چٹفنگ و ملکی سوگوی ، شونداری و شونہالی کن بے مٹ قربانی تسنو۔ وزیرستان نا علاقہ دتہ خیل اٹی پاک فوج انا ورناتا دہشت گرد آتون مقابلہ ٹی شہید مننگ آاست ہسونی نا درشانی ءِ کرسا اوپارے کہ تدوک آدے دتہ خیل اٹی پاک فوج انا کنڈآن دہشت گرد آتا ٹھکانہ غاتیا کروک آ آپریشن اٹی آفیسر تون اوار چار ورناشہیدی نا جام ءِ نوش کریر وہموڑے اودیم ہفت دہشت گرد آتے ہم خلکر۔ داخیال آتا درشانی ءِ او جمعہ نادے آ “اے پی پی” تون گپ وتران کرسا کرے۔ بنجائی وزیر گودی زبیدہ جلال پارے کہ دہشت گرد آک پاکستان نا شونداری و شونہالی نا عمل ءِ توننگ کن پاک فوج و الس آ جلہو کیرہ، ولے پاک فوج وزیرستان اٹی دہشت گرد آتا برخلاف کارروائی کرسا اوفتا مذموم مسخت آتے بے سہب کریر۔ اوپارے کہ کارروائی ٹی فوجی آفیسر تون اوار چار ورناشہیدی نا جام ءِ نوش کریر۔ ولے فوجی آفیسر و ورناتا قربانی تیا گمر ءِ اوپارے کہ وطن عزیز نا دشمن ملک آک سی پیک ڈٹ ءِ سرسہب مرسا ہُننگ خواپسہ۔ ولے پاک فوج و الس دا ملک دشمن تا عزم آتیان جوانی اٹ بلد ءُ۔ دہشت گردی نا برخلاف جنگ اٹی پاک فوج انا قربانی بے مٹ ءُ۔