ملتان انڈسٹریل اسٹیٹ اٹی ملک انا غٹ آن بھلا قرنطینہ سینٹر جوڑ

اسلام آباد(اے پی پی) وزیر خارجہ شاہ محمود قریشی پارینے کہ حکومت کورونا وائرس نا گڑتی تے مون آتخسا ایران آن اُراتیا پدی بروک آ زائر آتے خاص ءُ وخت اسکان آئسولیشن اٹ تخنگ کن ملتان انڈسٹریل اسٹیٹ اٹی ملک انا غٹ آن بھلا قرنطینہ سینٹر اس جوڑ کرینے۔ جمعہ نادے آ دا بابت تینا اسہ بیان اسے ٹی اوپارے کہ ملتان انڈسٹریل اسٹیٹ اٹ جوڑ کننگا دا قرنطینہ سینٹر مسہ ہزار کمرہ غاتیا تالانءِ ، ایران آن پدی بروک آ 1247زائر آتے دا قرنطینہ سینٹر آ گدریفنگانے۔ مخدوم شاہ محمود قریشی پارے کہ غٹ زائر آتے جتا جتا کمرہ غاتے ٹی تخنگانے۔ دا قرنطینہ سینٹر نا ہر کمرہ ٹی ہر بندغ ءِ جتا چارپائی، بسترہ، چپل ، صابن و ایلو المی آ گڑاتے تننگ انگ ءِ اوپارے کہ دا قرنطینہ سینٹر اٹی ساڑی زائر آتے طبی آسراتی تا فراوانی کن پنجاکٹ آتیا تالان اسہ ایمرجنسی ہسپتال اس ہم جوڑ کننگانے ہراٹی ڈاکٹرز و ایلو طبی عملہ ہروخت ساڑی ءُ، وخت اس کہ المی دوائی و ایلو طبی آسراتی تا ہم جوان بست و بند ءِ پک کننگانے۔ اوپارے کہ ای دا چرجوئی ٹی کمشنر و ڈپٹی کمشنر ملتان تون اوار ملتان نا ضلعی انتظامیہ تون لمحہ بہ لمحہ رابطہ ٹی اُٹ۔ شاہ محمود قریشی پارے کہ حکومت کورونا وائرس نا تالان مفننگ ءِ پک کننگ کن غٹ ممکنہ گام گیج چست کننگ ءِ، گرج دا ہیت انا ءِ کہ الس زمواری نا درشانیءِ کرسا حکومت نا کنڈآن تروک آ پارت و رکھی گام گیج آتیا عمل کیر تانکہ نن دا کھٹن حالیت آتون سرسہبی اتون مون تننگ کیر۔