پارٹی کارندہ غاک بروک آ گچین کاری نا تیاری تے بنا کیر‘ کلثوم نیاز بلوچ

کوئٹہ : نیشنل پارٹی نیاڑی ونگ انا صوبائی سیکرٹری کلثوم نیاز بلوچ نا کماشی ٹی علمدار روڈ آ پارٹی نا گچین کاری تا بابت اٹ دیوان اس اڈ ہلک۔ دیوان آن تران کرسا کلثوم نیا ز بلوچ پارینے کہ پارٹی کمامدار و کارندہ غاک بروک آ گچین کاری کن تیاری تے بنا کیر۔ پارٹی نا سرسہبی پالیسی نا سوب آن اُلس آ ہنسا گچین کاری ٹی کلین سوئپ کینہ۔ کارندہ غاک پارٹی نا سرمایہ ءُ و اوفتا ہر کہول آ راہشونی ءِ کینہ۔ دا ہیت ءِ او علمدار روڈ آ این اے265ضمنی الیکشن نا بابت اٹ اڈ ہلوک دیوان آن تران کرسا کرے۔ او وخت آ ورکنگ کمیٹی نا باسک سلمیٰ قریشی‘ سادیہ بادینی‘ سکینہ بتول‘ صدیقہ‘ فاطتمہ چنگیزی و ایلوفک تران کریر۔ او پارینے کہ اُلس ضمنی گچین کاری و لس گچین کاری ٹی تینا ووٹ انا کاریم ات اتنگ ءِ المی و ضمیر نا روشنائی ٹی کریر تو جوانی بریک۔ او پارینے کہ این اے 265کوئٹہ سٹی نا اُلس 16مارچ آ ارہ غا مہر خلسا نیشنل پارٹی نا پندار اومیت دار ڈاکٹر رمضان ءِ سرسہب کیر۔

(آن لائن)