حقدار زالبول آتے اوفتا حق آتیان محروم کننگ نا موکل تفنہ،اسسٹنٹ کمشنر سنجاوی مرمن کاکڑ

اسسٹنٹ کمشنر سنجاوی مرمن کاکڑ پارینے کہ ہچ ءُ زالبول اسے اونا حق آتیان محروم کننگ یا زیزاریفنگ نا موکل تننگپک۔ او پیدوار کرے کہ بینظیر انکم سپورٹ پروگرام (بی آئی ایس پی) نا رقم اٹی کانود آن چَپ کٹوتی کروک آتا برخلاف سخت کانودی و محکمانہ کارروائی عمل کننگک۔سرجم حوال آتا رِد اٹ مستحق زالبول آتا کنڈ آن زیات رقم ہرفنگ و کانود آن چَپ کٹوتی تا بابت مِلنگوک آ کیہی غاو تیان پد اسسٹنٹ کمشنر بی آئی ایس پی نا زرتس ہند انا اناگت دورہ ءِ کرے۔ دا موقع غا او زرتس نا ریسہ، انتظامی امور و مستحقین ءِ تننگوک آ آسراتی تا سرجم جاچ ءِ ہلک۔ مرمن کاکڑ زرتس کن بروک آ زالبول آتون انفرادی وڑ اٹ اوڑدہی کرے، اوفتا ویل آتے خف تورے و زرتس نا وڑ و ڈول، رقم نا وصولی، عملہ نا رویہ و مون تروک آ خواری تا بابت سرجم معلومداری ہلک۔اسسٹنٹ کمشنر متعلقہ کمامدار آتے پارت کرے کہ مستحق زالبول ءِ اونا پورو انگا رقم بیدس ہچ ءُ ہِرے و کٹوتی اسے نا تننگے۔