پاکستان اٹ ہول ہرفوک ءُ دے اس، اسہ دے اٹ کورونا غان 21 بندغ زوال

اسلام آباد(آن لائن)پاکستان اٹی کورونا وائرس نا 22 بندغ زوال مسنو۔ ہراڑان پد زوال آتا کچ 166 مسنے۔ وخت اس کہ پوسکن آ کیس آتا مون آ بننگ آن پد زہمی ناجوڑ آتا کچ 7993 اسکان سر مسنے۔ ملک اٹی مروک آ 166 زوال آتیان غٹ آن زیات خیبرپختونخوا ٹی مسنو، ہرافتا کچ 60 ءِ۔ وخت اس کہ سندھ اٹی 55، پنجاب 41، بلوچستان 5 ، گلگت 3 و اسلام آباد اٹی 2 زوال مسنو۔ یک شنبے نا دے ملک اٹی کورونا نا 252 کیس و 22 زوال رپورٹ مسنو۔ پنجاب اٹی یک شنبے نا دے 184 پین کیس و 4 مرک رپورٹ مسر، ہراڑان پد صوبہ ٹی کیس آتا کچ 3649 مس، وخت اس کہ زوال مروک آتا کچ 41 مسنے۔ وزیراعلیٰ پنجاب عثمان بزدار تینا سوشل میڈیا بیان اٹ صوبہ ٹی کیس و مرک آتا جم حالیت آن معلومداری تس۔ ترجمان پرائمری اینڈ سیکنڈری ہیلتھ کیئر نا رد اٹ داتم اسکان کورونا غان 684 بندغ جوڑ مسنو۔ وزیراعلیٰ سندھ نا ترجمان بیرسٹر مرتضیٰ وہاب سوشل میڈیا غا پارے کہ صوبہ ٹی کورونا غان زوال مروک آتا کچ 55 مسنے۔ خیبر پختونخوا ٹی کورونا نا 60 پوسکن کیس و 10 مرک رپورٹ مسر۔ ہراڑان پد صوبہ ٹی ناجوڑ آتا کچ 1137 و مرک آتا کچ 60 اسکان سر مسنے۔ بلوچستان اٹی ہفتہ نا دے کورونا وائرس نا 25 پین کیس مون آ بسنو، ہرافتے صوبائی ترجمان لیاقت شاہوانی پک کریسس۔ لیاقت شاہوانی نا رد اٹ صوبہ ٹی زہمی ناجوڑ آتا کچ 376 مسنے۔ ہرافتیان داتم اسکان ہندی وڑ اٹ 229 بندغ وائرس آن زہمی مسنو۔ وخت اس کہ 145 ایران آن بسر۔ یات سلے کہ بلوچستان اٹی داتم اسکان کورونا غان 5 بندغ زوال مسنو۔ و 142 ناجوڑ دراخ جوڑ مسنو۔ بنجائی دارالحکومت اٹی 8 پین بندغ اٹی کورونا وائرس پک مسنے، ہراڑان پد اسلام آباد اٹی ناجوڑ آتا کچ 171 مسنے، وخت اس کہ بادشاہی شار اٹی کورونا غان داتم اسکان 2 بندغ زوال مسنو۔