سفارتی چیلنج آتا درک کن تھنک ٹینک آتا کڑد المی ءِ، شاہ محمود قریشی

اسلام آباد(آن لائن)وزیر خارجہ شاہ محمود قریشی پارینے کووڈ-19 نا سوب آن ترندی ٹی بدل مروک آ جہانی منظر نامہ نا سوب آن سفارتی چیلنج آتا درک کن تھنک ٹینک آتا کڑد المی ءِ، او دا ہیت ءِ تدوک آ دے انسٹی ٹیوٹ آف سٹرٹیجک سٹڈیز نا پٹ وپول کروک آتا دیوان نا کماشی ءِ کرسا کرے ہرا اونا یعنی وزارت خارجہ نا کماشی ٹی اڈ ہلک۔ سیکرٹری خارجہ سہیل محمود، سپیشل سیکرٹری معظم احمد خان و وزارت خارجہ نا سینئر افسرک ہم دیوان اٹ بشخ ہلکر۔ دیوان نا وخت آ پڑ انا جوانی، کووڈ19 آن پد بدل مروک آ جہانی منظر نامہ و سفارتی محاذ آ دوئی مروک آ چیلنج آتیا بحث کننگا۔ ڈائریکٹر جنرل (آئی ایس ایس آئی)ایمبیسڈر (ر)اعزاز چودھری وژن 2020- 2023 نا بابت اٹ وزیر خارجہ ءِ جوان بریفنگ تس۔ داکان بیدس وزیر خارجہ مخدوم شاہ محمود قریشی تون پاکستان اٹی پوسکن تعینات مروک قطر انا سفیر شیخ سعود بن عبدالرحمان الثانی دفتر خارجہ ٹی اوڑدہی کرینے۔ دوشنبے نادے آ مروک آ اوڑدہی ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا باندات آتیا گپ وتران کننگا۔ وزیر خارجہ قطرانا سفیر ءِ پاکستان اٹی تینا زمواری تے سنبھالنگ آ مبارکبادی تس۔ وزیر خارجہ پارے کہ پاکستان و قطر انا نیام اٹ دیرینہ برادرانہ تعلقداری ءِ۔ اومیت ءِ کہ نا تعیناتی آن پاک قطر تعلقداریک پین سوگو مریرہ و ڈیہہ اٹی امن، سوگوی و شونہالی نا دوئی کننگ کن ہڑتوم آ کنڈآتا کمکاری ٹی ودکی مریک۔ قطری سفیر، امیر قطر عزت مآب شیخ تمیم بن حماد الثانی و قطری سرکڑدہ غاتا کنڈآن پاکستان نا سرکڑدہ و الس کن نیک است خواہی تا درشانی ءِ کرے۔