کینجر جھیل اٹی کشتی چَپی مس، کراچی نا 13 بندغ ڈبینگار

ٹھٹھہ( آن لائن)گنجائشت آن زیات بندغ نا تولفنگ نا سوب آن کینجھر جھیل اٹ پکنک کننگ کن بروک آ سیلی تا کشتی ڈبینگا، ہراڑان 13 بندغ ڈُب ہلکر اوفتے آن 11 بندغ تپاخت کریر، تپاخت کروک آ نیاڑی تتون اوار چُناک اوار، سول اسپتال مکلی ٹی ایمرجنسی نافد، ایس ایس پی ٹھٹھہ و ڈی سی ٹھٹھہ جھیل آ سر مرسا حالیت نا جاچ ءِ ہلک۔ حوال نا رداٹ کراچی نا نرسری نا علاقہ غان تعلق تخوک ءُ اسہ خاہوت نا بندغ آک ٹھٹھہ نا تاریخی جھیل کینجھرجھیل آ پکنک کننگ کن بسوسُر ولے کڑمب انگا دیر اٹ کشتی نا ڈبینگ انگ نا سوب آن کشتی ٹی سوار 13 بندغ ڈبینگار اوفتے ٹی اسہ چُناسے تون اوار 11 بندغ ڈُب ہلسا تپاخت کریر ایلو 2 بندغ آتے زندہ بچیفنگانے، بد نصیب آ خاہوت کشتی ٹی سوار مرسا نوری نا مزار نا زیارت کن ہناکہ کشتی ٹی گنجائشت آن زیات بندغ آتے تولفنگ نا سوب آن کشتی چپی مس و ڈب ہلک۔ کشتی ٹی سوار انگا بندغ آتا کوک و پوہاڑ آن پد ہندی بندغ آک بھلو جہد اسے آن پد کل بندغ آتے پیشن کشار ولے او وخت اسکان اسہ چُناسے تون اوار 6 نیاڑی تپاخت کریسر وخت اس کہ ارا نیاڑی ءِ ہسپتال آ درسا دم تسر، وخت اس کہ گڈیکو ڈس اسکان پدریسہ 4گھنٹہ غاتیان ایلو مسہ بندغ نا پٹنگ برجا ئس ہرافتا کہنگ آن پد گمان کننگانے۔ تپاخت کروک آتیٹی عروج ، سادیہ ، روبینہ ، شانزیہ ، ایمان ، امان ، روزفا اوار ءُ وخت اس کہ ایلو بچوک آتے خراب ءُ حالیت اسے ٹی سول ہسپتال مکلی آ اتنگا، ڈس ملنگ آن پد سول اسپتال مکلی ٹی ایمرجنسی نافد کننگاسُس۔