خضدار اٹی پوسکنوڑ آسراتی تیان شُپ شہید عثمان عاشق لائبریری نا بنا

علم و ادب نا شونداری نا کنڈ آ اسہ تاریخی ءُ گام اس ہرفسا خضدار اٹی نیشنل ہائی وے آن خڑک ڈی پی سی نا دنگ اٹی پوسکنوڑ آسراتی تیان شُپ شہید عثمان عاشق نا پن آ تخوک لائبریری نا باقاعدہ بناءِ کننگا۔ کمشنر قلات ڈویژن ڈاکٹر طفیل بلوچ ڈپٹی کمشنر خضدار عبدالرزاق ساسولی، ایس ایس پی خضدار دوستین دشتی و ایلو ضلعی کمامدار اتٓتون اوار تختی نا مون پاشی ءِ کرسا لائبریری نا بناءِ کرے۔ بنائی دود اٹی افسرو شارانا متبر آک ساڑی ئسر، ہر اسٹ خوش ئس انتئے کہ اسہ ہندن ءُ تعلیمی ڈٹ اس درستی راستی کرفنگانے ہرا تعلیمی باب و تاریخ جوڑ مریک و ورنا چین انا اومیت نا ہند مریک۔ دا ڈٹ انا کل آن جتا انگا ہیت دادے کہ ہرا ماڑی ءِ لائبریری ٹی بدل کننگانے، او 1994 آن غیر آباد و بینگ ئس۔ کمشنر قلات ڈویژن نا بھلا وژن و ضلعی انتظامیہ نا است خواہی دا بھسکاری نا گواچی بلڈنگ ءِ پورو وڑ اٹ بحال کرسا اودے علم انا ہند اس جوڑ کرے۔ اوفتا گچین وژن دا ماڑی ٹی ہندن ءُ ہیرا جوڑ کننگا کہ داسہ شاہراہ غان گدرینگوک آ ہر شاری داڑے علم و کتاب نا خوشبو ءِ محسوس کرسا تدینگک۔