کمشنر لورالائی نا کماشی ٹی ڈویژنل تعلیمی جاچ دیوان

کمشنر لورالائی ڈویژن ولی محمد بڑیچ نا کماشی ٹی ڈویژنل کہول آ محکمہ تعلیم نا کارکڑد و تعلیمی شونداری نا جاچ ءِ ہلنگ کن اسہ اہم ءُ دیوان اس اڈ ہلک۔ دیوان اٹی ڈسٹرکٹ ایجوکیشن آفیسر (ڈی ای او) لورالائی بختیار کاکڑ، ڈی ای او دکی امیر شاہ بخاری، ڈی ای او موسیٰ خیل، ڈی ای او (فی میل) فوزیہ درانی، آر ٹی ایس ایم محمد خان، یونیسف نا نمائندہ و محکمہ تعلیم نا ایلو تعلقدار افسر آک بشخ ہلکر۔ دیوان نا وخت آ لورالائی ڈویژن نا کل ضلع غاتا تعلیمی افسر آک تینا تینا ضلع غاتے ٹی تعلیمی حالیت، شونداری، داخلہ مہم، استاد آتا حاضری، اسکول آتیٹی بنداوی آسراتی، طالب علم آتا کارکڑد ومون تروک ویل آتا بابت سرجم بریفنگ تسر۔ شریدار آک تعلیمی آب ءِ گچین کننگ، اسکول آتیٹی آسراتی تا فراوانی وطالب علم آتا ڈراپ آؤٹ نا کچ ءِ کم کننگ کن چندی سلاہ تے ہم تسر۔ لورالائی (میر محمود بلوچ)