چاغی ٹی یوریا کھد و کشاری دارو تا نہاد آتیٹی ودکی، زمیندارک فریشان

چاغی نا پنی آ زمیندار ملک محمد یوسف توتازئی تینا اسہ بیان اسے ٹی پارینے کہ چاغی ٹی یوریا کھد و کشاری دارو تا نہاد آتیٹی پدریسہ ودکی آن چاغی نا زمیندارک سخت فریشان ءُ۔ چاغی بازر اٹی یوریا کھد انا نہاد آک آسمان تون ہیت کننگ اٹی ءُ، ہرا نا سوب آن چاغی نا زمیندارک بدحالی نا زند گدریفنگ اٹی ءُ۔ او پارے کہ چاغی نا زمیندار تے پیماز و کرپاس نا فصل آن ہچ ءُ خاص ءُ فائدہ اس متنے۔ زمیندارک تینا ٹیوب ویل آتے ڈیزل آ چلیفنگ اٹی ءُ ہراڑان خڑچ ہم زیات مننگ اٹی ءِ‘ کھد و ڈیزل نا ارٹ ہموخس کبین مننگ آن زمیندار تا وس جواب تسنے۔ ڈیزل نا کبینی نا سوب آن ڈغار تے آباد کننگ کن ٹریکٹر نا خڑچ آتیٹی ہم ودکی مسنے۔ او پارے کہ دا کبینی ٹی زمیندار تپہ کل آن زیات زہمی مسنے، ہندا سوب آن شار اٹی کھد انا سرکاری نہاد پک کننگے۔ او وزیراعلیٰ بلوچستان میر سرفراز بگٹی و ایم پی اے چاغی آن خواست کرے کہ زمیندار تے کشاری پیکج تننگرے تانکہ او دا مشکل آ وخت اٹی تینا نت آ سلسا راج انا گرج آتے پورو کننگ کیر۔