جموں کشمیر گچین کاری تا رد اٹ بلوچستان اٹی پبی مہم چلیفنگک،گورنر جعفرخان مندوخیل

گورنر بلوچستان شیخ جعفر خان مندوخیل تون پاکستان مسلم لیگ (ن) نا بنجائی راہشون و فوکل پرسن وزیراعظم یوتھ پروگرام بلوچستان نعیم کریم و آزاد جموں و کشمیر نا کوئٹہ ٹی ساڑی ووٹرز و کارندہ غاک اوڑدہی کریر۔ اوڑدہی نا وخت آ داسہ نا سیاسی حالیت آتتون اوار جموں و کشمیر نا بروک آ جنرل گچین کاری تا بابت خوڑتی اٹ گپ وتران کننگا۔ دا خت آ پاکستان مسلم لیگ (ن) نا اومیتدار ناصر حسین ڈار و نعیم خان نیازی نا گچین کاری مہم، تنظیمی باندات و گچین کاری سج پام آ ہیت وگپ کننگا۔ ڈل گورنر بلوچستان ءِ گچین کاری سرجز آتیان آگاہ کرے و دا عزم انا درشانی ءِ کرے کہ جموں و کشمیر نا گچین کاری تیٹی پاکستان مسلم لیگ (ن) نا اومیتدار آتا سرسہبی کن پبی وڑ اٹ گچین کاری مہم چلیفنگک۔ دا وخت آ اشرف جاوید کرد، شکیل بٹ، محسن رضا، محمد اشرف ڈار، عمیر بٹ، نثار دلاور و ایلو کارندہ غاک ہم ساڑی ئسر۔ ڈل اتون ہیت و گپ کرسا گورنر بلوچستان جعفرخان مندوخیل آزاد جموں و کشمیر نا گچین کاری تا پرامن وڑ اٹ پوروی و جمہوری عمل نا سرسہبی کن نیک انگا استخواہی تا درشانی ءِ کرسا پارے کہ جمہوری نظام نا سوگوی و نت آ سلنگ‘ الس نا پورو فعالیت و پبی بشخ ہلنگ اٹی ءِ۔ جمہوریت تینا واک ءِ ہمو وخت آ دوئی کیک ہراتم ہر شاری تینا وونٹ ءِ ملک و قوم انا روشنا آخبت نا جوڑ کننگ کن کاریم اٹ اتیک۔ ہراتم نن اسہ الس دوست، دیانتدار اومیتدار اس گچین کینہ، تو نن اصل اٹ تعمیر و شونداری نا بنداو ءِ تخنہ۔ گورنر مندوخیل پارے کہ السی سرکڑدہ دا ہیت ءِ پک کیک کہ شونداری بیرہ نعرہ غاتسکان کچ اٹ مف بلکن گچین کاری علاقہ غاتیٹی تعلیمی ادارہ، جانجوڑی ہند‘ روڈ و روزگار نا وارخواہی تیٹی ودکی پک مننگ کے۔ ہنداوڑ نن چنک وختی اصلاحات نا بدل اٹی شفافیت، پرسجوئی و مریس وختی ڈٹ بندی اٹ مستی کانہ۔