سپریم کورٹ نا مچ آ ملک انا شاپنگ مال آتے ملنگ نا پرمان

اسلام آباد : چیف جسٹس پاکستان گلزار احمد مچ آ ملک انا شاپنگ مال آتے ملنگ تون اوار شنبے و یک شنبے آ ہم غٹ چنکا مارکیٹ آتے ملوک اِلنگ نا پرمان جاری کرینے، چیف جسٹس ریمارکس تسے کہ مگہ دین حکومت آتتون قول کرینے کہ او شنبے و یک شنبے آ بفک، مگہ حکومت آک شنبے و یک شنبے آ دم درینگرہ، شنبے و یک شنبے آ دے ، دے کی آن ٹِک ایتک۔ عئید آ رش ودک، شنبے و یک شنبے آ ہم مارکیٹ آتے بند کننگپ۔ 500 ارب روپئی کورونا ناجوڑ آتیا خڑچ مریر تو ہر ناجوڑ کروڑ پتی جوڑ مریک، دا کل پیسہ غاک ہرانگ ہننگ ءُ؟ حکومت کس آ تورو کپننگ ءِ۔ جانجوڑی محکمہ ٹی دُز ارے، سرکاری ہسپتال آتیٹی کمیشن کننگ نا چکار اٹی تھرڈ کلاس دارو ہلنگک۔ سپریم کورٹ اٹی چیف جسٹس گلزار احمد نا کماشی ٹی 5 باسکی لارجر بینچ کورونا ازخودنوٹس کیس انا سماعت ءِ کرے۔ ہراٹی ایڈیشنل اٹارنی جنرل عدالت اٹی پیش مس، وخت اس کہ اٹارنی جنرل خالد جاوید ویڈیو لنک نا کمک اٹ کراچی رجسٹری آن دلیل تس۔ کیس انا سماعت نا وخت آ چیف جسٹس ایڈوکیٹ جنرل سندھ و کمشنرکراچی ءِ پارت کرے کہ او چنکا دکاندار تے کاریم آن تورپ۔ حکومت نا کنڈ آن کورونا نا خلیس نا رد اٹ اِرا دے پوریا جا تے بند کننگ نا نا حکم ءِ آئین نا آرٹیکل 4, 18 و 25 نا خلاف ورزی گوندسا سوج چست کرے کہ ننے دانا منطق ءِ پاننگے، کہ مگہ دین حکومت تون قول کرینے کہ و شنبے و یک شنبے آ بفک۔ عدالت عظمیٰ د وخت آ مچ آ ملک انا شاپنگ مال آتے ہفت دے اکن ملنگ وخت اس کہ چنکا مارکیٹ آتے شنبے و یک شنبے آ ہم ملنگ نا موکل تننگ نا پرمان جاری کرے۔

(آن لائن)