گورنر راج اٹ بشخ ملپننگ آ سیاسی جماعت اسے نا سروک خار اٹی ءِ،بنجائی وزیر داخلہ

لاہور، بنجائی وزیر داخلہ محسن نقوی پن ہلپرسا پارینے کہ گورنر راج اٹی بشخ و گورنر شپ ملپننگ آ اسہ سیاسی جماعت اسے نا سروک بھاز خار اٹی ءِ۔ لاہور اٹی صحافی تتون غیر رسمی ہیت وگپ کرسا او پارے کہ گورنر راج اٹی بشخ و گورنر شپ ملپننگ آ اسہ سیاسی جماعت اسے نا سروک بھاز خار اٹی ءِ، دا ہمو سیاستدان ءِ ہرا مستین کیہی دہائی تسکان اسٹیبلشمنٹ نا کمک اٹ سیاست کرسا ہنانے۔ او پارے کہ اونا دا حالیت ئس کہ تینا سیاسی جماعت نا ہوائی ٹکٹ ءِ ہم اسٹیبلشمنٹ آن جوڑ کرفیکہ‘ دا وڑ انا سیاستدان آتے اینو ایلوفتیا ہور ہرفنگ زیب تفک‘ سیاسی اختلاف تینا جاگہ غا ولے دوبہ خلنگ نا جاگہ غا دلیل و راستکی تا بنداو آ بایدے ہیت مرے۔ او پارے کہ منہ سیاسی راہشون تے اینو مسکوہی فاٹا نا ضلع غاتا وسیلہ غاتا باندات آ بھاز گڑتی مننگ اٹی ءِ، ہراتم کیہی سال اسکان مسکوہی فاٹا نا ضلع غآتے اوفتا روا انگا بشخ رسینگتوکہ تو ہمو وخت آ دا بندغ آک انتئے چُپ ئسر؟ ہمو وخت آ اوفتے مسکوہی فاٹا نا الس نا حق آتیکن ہچ ءُ بیان اس تننگ انتئے یات بتو؟ وزیر داخلہ پارے کہ مسکوہی فاٹا نا الس نا حق و وسیلہ غاتا باندات بایدے سیاسی فائدہ غاتیان ایڑتر مرے۔ خیبرپختونخوا دا وخت آ سیکورٹی چیلنج آتتون مون تننگ اٹی ءِ۔ محسن نقوی پارے کہ سیاسی راہشونک خاخر لگفنگ و بے چیٹی تالان کننگ نا جاگہ غا امن و نا بحالی و دہشت گردی نا چٹفنگ کن تینا کڑد ءِ ادا کیر، خیبرپختونخوا ءِ دا وخت آ سیاسی چک وتاڑ آخا بلکہ امن، سوگوی و اسیجائی کوشست آتا گرج ءِ۔