پاکستان برآمد آتالان شونداری، آئی ٹی برآمد آتیٹی ودکی آ کاریم کننگ ءِ،وزیر خزانہ محمد اورنگزیب

بنکاک، بنجائی وزیر خزانہ و بنگکاری سینیٹر محمد اورنگزیب امریکی محکمہ خزانہ نا انڈر سیکرٹری جہانی باندات ایرن بران تون اوڑدہی کرینے و پاکستان نا زرگزرانی منظرنامہ، اصلاحات، پیشن نا مالی کمکاری و برآمد آ تالان شونداری نا گام گیج آتیا گپ وتران کرے۔ بنکاک اٹی جہانی بینک گروپ و آئی ایم ایف نا سالانہ دیوان آتاوخت آ مروک دا اوڑدہی ٹی گورنر اسٹیٹ بینک آف پاکستان جمیل احمد ہم ساڑی ئس، اوڑدہی نا وخت وزیر خزانہ ستمبر اٹ پاکستان نا کنڈآن 3 ارب ڈالر نا یورو بانڈ انا جاری کننگ و سکوک، پانڈا بانڈز اتون اوار ایلو مالیاتی وڑ تا کمک اٹ وسیلہ غاتا دوئی کننگ اٹ وڑ پہ وڑی ودی کننگ نا ڈٹ آتیان معلومدار کرے۔ او آئی ایم ایف پروگرام نا رداٹ پیشرفت، خراج اصلاحات، پدریسہ مسہ سال بنداوی مالیاتی سرپلس نا دوئی کننگ و زرکوڑی تا ودسا کم وود 21.6 ارب ڈالر اسکان سرمننگ نا بارواٹی ہم پارے۔ او پارے کہ پاکستان برآمد آتالان شونداری، آئی ٹی برآمد آتیٹی ودکی و جہانی منڈی تیٹی پاکستانی گڑاتا گوبر ءِ گچین جوڑ کننگ آ چکار کننگ ءِ۔ او دا رد اٹ وام تا مدامگی ءِ ہم اہم گوندا تانکہ ملک انا وتواجہ کریڈٹ ریٹنگ ءِ ڈبل بی درجہ اسکان دننگ نا کنڈآ پیش رفت کننگ مرے، اوڑدہی ٹی علاقائی جھیڑہ غاتا توانائی، کبینی و غذائی رکھ آ زہم، رسد نا ریسہ و سیل انا موسم اٹی توانائی نا خواست ءِ پورو کننگ نا تیاری تیاہم گپ وتران کننگا۔ وزیر خزانہ نجکاری، بالی پٹ آتا انتظامی باندات ءِ آٹ سورس کننگ، بوئنگ تون رابطہ و امریکی ایکسپورٹ امپورٹ بینک نا آن گمانی مالی کمکاری نا باندات آتیا ہم گپ وتران کرے۔ او پاکستان تون امریکہ نا پدریسہ کمکاری آ منت واری نا درشانی ءِ کرے۔