ٹرمپ نا ایران نا برخلاف ایٹمی سلہہ کاریم اٹ اتپننگ نا پڑو

واشنگٹن، امریکی صدر ڈونلڈ ٹرمپ ایران آ جوہری سلہہ کاریم اٹ اتپننگ نا پڑو ءِ کرسا امریکی ڈغاری فوج راہی کننگ نا گمان ءِ مسترد کرینے۔ نیوز میکس ءِ تروک اسہ انٹرویو اسے ٹی امریکی صدر ڈونلڈ ٹرمپ پارینے کہ او ایران نا برخلاف جوہری سلہہ کاریم اٹ اتپک۔ او پارے کہ ایران اٹی امریکی فوجی دستہ تعینات کننگ نا ہم ہچ ءُ ارادہ اس اف‘ امریکی صدر مستی پارے کہ امریکہ جوہری سلہہ تا چٹفنگ نا باندات آ روس و چین اتون ہم ہیت کننگ اٹی ءِ۔ ٹرمپ نا دا بیان ہمو وخت آ مون آ بسنے ہراتم امریکی میڈیا دعویٰ کریسس کہ امریکی فوج ایران نا برخلاف گمانی وڑ اٹ پوسکن آ جلہو تا ڈٹ آتیا کاریم کننگ اٹی ءِ۔ دا ڈٹ آتیٹی ایران نا توانائی نا بنداوی پنجر و جوہری میرات آتے شست کننگ کن امریکہ نا کل آن بھلا غیر جوہری بمب انا کاریم اٹ اتنگ نا گمان آ ہم سجفنگ نا پاریسس۔