ایرانی پائلٹ آتے دزگیر کتنن، تہران ءِ آپریشن نا بابت سرجم آتا جاچ انا سلہ خلکنن،ترجمان قطری وزارت خارجہ

دوحہ، تہران، قطر ایرانی پائلٹ آتے دزگیر کننگ نا دعویٰ نا تردید ءِ کرسا پارینے کہ مارچ اٹی ایرانی بالی جہاز آک قطری فضائی دنگ انا خلاف ورزی ءِ کریسر و رابطہ نا کیہی کوشست آتا ورندی ءِ تتوس۔ قطری وزارت خارجہ نا ترجمان سوشل میڈیا پلیٹ فارم ایکس آ بیان اٹی پارے کہ اوکان پد پٹ و پول و کمکی ٹیمک اسہ پائلٹ اسے نا جون ءِ دوئی کریر و اوفتے تننگ کن ایرانی کمامدار آتتون حوال کننگا۔ قطری ترجمان نا رِد اٹ تہران ءِ آپریشن نا بابت سرجم آتا جاچ انا سلہ ہم خلنگا، ولے ایران نا کنڈ آن داسکان دا سلہ نا ورندی تننگتنے۔ ایلو کنڈ آ ایرانی فوجی کمامدار آک قطر آن خواست کرینو کہ ایرانی چاہندار و جاست پاستی ٹیم ءِ ملک اٹی پترینگسا ایرانی پائلٹ آتا باندات نا جاست پاست نا موکل تننگے۔ ایران نا سلہہ بند فوج انا جنرل اسٹاف نا گم مروک بندغ آتا پٹ و پول نا کمیٹی نا کمانڈر محمد باقرزادہ پارے کہ فضائیہ و راستی تا جاچ ہلوک آ ٹیم کیہی تُو آن قطر اٹی پترینگنگ کن ہُروک ءِ‘ قطر نا موقف ءِ کہ ایرانی بالی جہاز آتا کنڈ آن اونا فضائی دنگ اٹی پترینگ انگ آن پد ملکی دنگ انا رکھ کن گام گیج کننگا، وخت اس کہ پائلٹ آک قطری کمامدار آتا کنڈ آن رابطہ نا کوشست آتا ہچ ءُ ورندی اس تتوس۔دا پیش رفت ہندن آ وخت اٹی مون آ بسنے ہراتم ڈیہہ ٹی ایران، اسرائیل و امریکہ نا نیام اٹی ترند چک و تاڑ برجا ءِ و ایران و امریکہ نا نیام اٹی جلہو آتا سوب آن جھیڑہ خلیجی ڈیہہ اسکان تالان مسنے۔ داڑان مست ایران 2 مارچ آ قطر اٹی امریکی فوجی اڈہ غا فضائی جلہو آن پد گم مننگ اوکان پد پاننگوک وڑاٹ قطری فوج انا کنڈآن دزگیر مروک 3 ایرانی پائلٹ آتا فوٹو تے جاری کرے۔ ایران تدوک آ دے اولیکو وار السی کہول آ دا ہیت ءِ پک کریسس کہ 2 مارچ آ قطر اٹی امریکی فوجی اڈہ غا جلہو آن پد گم مروک آ ایرانی فضائیہ نا 3 پائلٹ ءِ قطری فوج دزگیر کرینے۔ ایرانی حوالکاری ادارہ نا رِد اٹ ایرانی فوج انا اسہ عہدیدار اس انٹرنیشنل کمیٹی آف ریڈ کراس (آئی سی آر سی) آن خواست کرینے کہ او ایرانی پائلٹ آتا حالیت نا جاست پاست ءِ کے و اوفتا آجوئی کن گام ہرفے۔ حوالکاری ادارہ نا رِد اٹ ایران نا سلہہ بند فوج آتا جنرل اسٹاف نا گم مروک بندغ آتا پٹ و پول نا کمیٹی نا کمانڈر بریگیڈیئرر جنرل محمد باقرزادہ انٹرنیشنل کمیٹی آف ریڈ کراس نا صدر مرجانا اسپولیارک ایگر نا پن آ اسہ چٹھی اسے ٹی گم مروک مروک ایرانی پائلٹ آتا بابت گڑتی نا درشانی ءِ کرے۔ بریگیڈیئرجنرل محمد باقرزادہ نا رِد اٹ 2 مارچ 2026ء آ ایرانی فضائیہ نا اِرا ایس یو 24 جنگی بمبار بالی جہاز آک ایران آ مروک جلہو آتا ورندی ٹی قطر اٹی اسہ امریکی فوجی اڈہ اسے نا کنڈ آ راہی مسوسر۔ ایرانی بریگیڈیئرجنرل چٹھی ٹی پارینے کہ ایران ءِ دوئی مروک حوال آتا رِد اٹ دا واقعہ ٹی اوار ایلو 3 پائلٹ، جواد صالحی، عبدالحمید دشتیان و عمران بہ رویشیان، قطری فوج انا دو آن زندہ دزگیر مسوسر۔