پبلک ٹرانسپورٹ ءِ ملنگ نابابت فیصلہ ءِ وزیراعلیٰ کیک‘ ترجمان بلوچستان حکومت

کوئٹہ (آن لائن) حکومت بلوچستان نا ترجمان لیاقت شاہوانی پارینے کہ قومی مالیاتی کمیشن کن جاوید جبار ءِ پن کننگ حکومت نا حق ءِ‘ حکومت کورونا وائرس نا گام گیج آتا بابت اپوزیشن نا اسیجائی اٹ کاریم کیک‘ پبلک ٹرانسپورٹ ءِ ملنگ نابابت وزیراعلیٰ جام کمال جاچ ہلنگ آن پد فیصلہ کیک‘ کورونا نا حالیت آتے ٹی زرگزرانی ویل آتے ہم گوجالنگ مفک‘ صوبہ نا 3لکھ آن زیات خاہوت لاک ڈاﺅن آن زہمی مسنو‘ خراج ہلنگ نا کمتی آن بروک آسال بجٹ آ زہم تمک‘ بجٹ ءِ تیار کننگ انگ ءِ ہرادے جون اٹ پیش کننگک‘ اسہ ہفتہ ٹی صوبہ ٹی 6سَد 68 پوسکن ءُ کیس رپورٹ مسنو کل کیس تا 59درسَد تدوک آ 2ہفتہ ٹی رپورٹ مسنے اگہ الس ایس او پی تیا عمل کتو تو سخت لاک ڈاﺅن کننگ آبیوس مرینہ۔ دا خیال آتا درشانی ءِ او سول سیکرٹریٹ اٹ پریس کانفرنس آن تران کرس کرے۔ او پارے کہ پوریاگر و الس نا خواست آ لاک ڈاﺅن اٹ کمتی کننگانے‘ پوریاگر تنظیمک کورونا وائرس نا بابت رکھی گام گیج آتیا سختی اٹ عملدرآمد نا باور کرفینو‘ پوریاگر تا کنڈآن ایس او پی تیا عملدرآمد مفننگ ءِ ہرانا سوب آن کورونا نا ترندی اٹ تالان مننگ ناخلیس ارے‘ الس آن خواست ءِ کہ او زمواری نشان ترسا رکھی گام گیج آتیا عمل کیر۔ او پارے کہ پبلک ٹرانسپورٹ اونر آتا کنڈآن باور کرفنگان کہ ایس او پی تیا عمل کننگک۔ پبلک ٹرانسپورٹ ءِ ملنگ نابابت وزیراعلیٰ جاچ ہلنگ آن پد فیصلہ کیک۔او پارے کہ ایس او پی نا خلاف ورزی کننگ آ 528 بندغ ءِ دزگیر کننگا‘ دا وخت آ کورونا غان دراخ جوڑ مروک ناجوڑ آتا کچ 18 درسَد ءِ‘ زوال آتا کچ ودسا داسہ 2 درسَد مسنے‘ رپورٹ مفروک شکبر بندغ آتا زوال آتا جم آتے مچ کننگ انگ ءِ۔2 لکھ، 35 ہزار خاہوت ءِ راشن تننگانے۔ این ڈی ایم اے ناکنڈآن مسہ پی سی آر مشین فراوان کننگانے‘ اوپارے کہ 2 ہزار آن زیات بندغ اُراتے ٹی آئیسولیٹڈ ءُ ‘ صوبہ ٹی عئید ءِ بھاز سادگی اٹ اڈ تننگک‘الس عئید انا شاپنگ ناجاگہ غا پیسہ غاتے راشن تننگ آ خڑچ کے۔ این ایف سی نا بابت او پارے کہ جاوید جبار بلوچستان نا نمائندگی کن جوان ءِ۔