باجوہ امریکہ و سعودیہ تون ننا تعلقداری تے خراب کرفے، عمران خان

لاہور : پاکستان تحریک انصاف نا چیئرمین عمران خان پارینے کہ اسٹیٹ بینک سپریم کورٹ نا پاننگ آ پیسہ تفک تو دانا مطلب دادے کہ پاکستان اٹ آئین و کانود نا بادشاہی چٹانے‘ نن مذاکرات کننگ اٹی ان وخت اس کہ آئین نا رد اٹ مذاکرات نا گرج اف۔ 90 دے آن پد نگران حکومت نا ہچ ءُ آئینی حیثیت اس سلپک، باجوہ کنا حکومت نا امریکہ و سعودیہ تون تعلقداری تے خراب کننگ نا مہم چلیفے ہرانا مسخت ایکسٹینشن ہلنگ ئس۔ دا خیال آتا درشانی ءِ او لاہور ہائی کورٹ اٹ پیشی نا وخت آ بیان و صحافی تتون غیررسمی ہیت وگپ کرسا کرے۔ عمران خان پارے کہ آخری وار نم آپریشن ءِ توریرے ولے پولیس اُراٹی پترینگا‘ کن تون حوال ارے کہ عئید آن زمان پارک اٹ دوارہ آپریشن مریک و ہموڑے کشت وخون مریک۔ عمران خان عدالت آن پولیس آپریشن ءِ توننگ ناخواست کرساپارے کہ دا گچین کاری تے باہ تننگ آن خلنگ اٹی ءُ‘ دافک کنے بیرہ جیل کننگ آخا بلکہ کنے کسفنگ خوارہ۔ داکان مست جلہو مس و اللہ کنے بچفے۔ داکان گڈ کمرہ عدالت اٹ صحافی تتون غیر رسمی ہیت وگپ اٹ او پارے کہ نن مذاکرات کننگ اٹی ان ولے آئین نا رد اٹ مذاکرات نا گرج اف‘ 90 دے آن پد گچین کاری مننگ کپک‘ اوڑان پیشن آئین چٹک‘ داڑا ملک انا مچ آ لیگل کمیونٹی امناءِ۔ عمران خان پارے کہ 90 دے آن پد نگران حکومت نا ہچ ءُ آئینی حیثیت اس سلپک۔ 90 دے آن پد او انت کریر او غیر آئینی مریک‘ او پارے کہ دافتے اینک کرسا اسہ ایڈمنسٹر اس جوڑ کننگے ہرانا کاریم بیرہ گچین کاری کرفنگ مرے۔ اوپارے کہ دا نگران حکومت پین کس انا ایجنڈا غا بسنے‘ نگران حکومت گچین کاری کرفنگ آن بیدس ایلو کل گڑاتے کننگ اٹی ءِ۔ دا نگران حکومت ہمو بیر ہلوک کارروائی تے کننگ اٹی ءِ ہرا وخت اس گچین مروک حکومت آک ہم کتنو‘ دا لندن پلان نا بشخ اسے ہراڑے نوازشریف تون قول کننگاسس۔ دا تحریک انصاف ءِ شیف خلنگ و نوازشریف نا کیس تے چٹفنگ نا ایجنڈا غا کاریم کننگ اٹی ءِ۔

(آن لائن)