قومی اسمبلی،مفتی عبدالشکور ءِ خراج تحسین کن قرارداد امنائی اٹ منظور

اسلام آباد : قومی اسمبلی امنائی اٹ مسکوہی بنجائی وزیر مذہبی امور مفتی عبدالشکور ایماندار ءِ خراج تحسین پیش کننگ نا قرارداد ءِ منظور کرے‘ بنجائی وزیر پارلیمانی امور مرتضی جاوید عباسی مفتی عبدالشکور نا شکست نا جاست پاست نا قرارداد ءِ پیش کرے ہراٹی پاننگا کہ دا ایوان مفتی عبدالشکور نا شکست ناوقعہ نا ہر پہلو آن جاست پاست کننگ نا خواست کیک۔ مفتی عبدالشکور نا حاجی تیکن کروک خذمت آتے خراج تحسین پیش کیک۔ قرارداد نا رد اٹ مفتی عبدالشکور اسہ ایماندار ءُ انسان اس ئس‘ مفتی عبدالشکور نا خذمت آتیا اودے قومی اعزاز تننگے‘ قومی اسمبلی امنائی اٹ مفتی عبدالشکور ءِ خراج تحسین پیش کننگ نا قرارداد ءِ منظور کرے۔ وزیرداخلہ رانا ثناء اللہ ایوان آن تران کرسا پارے کہ مفتی عبدالشکور ءِ اونا خذمت آتا امانائی اٹ قومی اعزاز تننگے۔ مفتی عبدالشکور درویش منش انسان اس ئس‘ راست گو انسان اس ئس۔ مفتی عبدالشکور جے یوئی آئی نا گمر ئس‘ دا واقعہ نا خوڑتی اٹ جاست پاست کننگ انگ ءِ‘کل پہلو تیان مچ آ باندات ءِ ہننگ انگ ءِ‘ دا وخت اسکان ہرا گڑا مون آ بسنے تو دا شکست اس ئس۔ وزیر داخلہ پارے کہ کس اس زراکا کرینے دا بارو اٹ داسکان ہچ ءُ گڑاس مون آ بتنے‘ جاست و پاست و پرسجو نا عمل برجا سلک۔ قومی اسمبلی نا دیوان اٹ بنجائی وزیر جانجوڑی قادر پٹیل بنجائی وزیر مذہبی امور مفتی عبدالشکور نا کزیت آ است ہسونی درشان کرسا پارے کہ مفتی عبدالشکور اسہ گچین ءُ عالم دین اسے تون اوار اسہ ایماندار ءُ بنجائی وزیر اس ئس۔ راست گو بنجائی وزیر اس ئس‘ ہراوڑ او ننے آن ہنا او بھاز است ءِ ہسون کروک و گڑتی نا سوب ءِ۔

(آن لائن)