ایلکس ہیلز کرونا وائرس آن زہمی مننگ نا خبر ءِ رد کرے

کراچی (مانیٹرنگ ڈیسک) پی ایس ایل اٹ کراچی کنگز کن گوازی کروک آ برطانوی گوازی گر ایلکس ہیلز تینا جانجوڑی نا بابت اٹ بیان اس جاری کرے۔ راجی ویب سائٹ ٹوئٹر آ تینا کلہو اسے ٹی انگلش گوازی گر الیکس ہیلز پارینے کہ کرکٹ نا دنیا و سوشل میڈیا آ کنا بابت اٹ کیہی ہوکاک پیری کننگ اٹی ءُ، ای دا سمجھوہ کہ کل ءِ حالیت آتے مون آ تخو۔ الیکس ہیلز پارینے کہ جہانی دَین کرونا نا سوب آن ایلو درملکی گوازی گر تا بابت ای ہم پی ایس ایل ءِ نیمہ غا ہلسا تینا ملک آ پد بننگ نا فیصلہ کریٹ۔ کنے ہندن لگا کہ لاک ڈاون مننگ آ ہزار آ میل مُر تولنگ نا جاگہ غا تینا خاہوت تون مننگ بھاز اہم مریک۔ برطانوی گوازی گر مستی پارینے کہ شنبے نا سہب اتون ہراتم ای انگلینڈ ءِ سر مسٹ تو جانجوڑ اسٹ او کرونا وائرس نا ہچو نشانی اس کنے ٹی اف، مچہ جکاٹہ، حکومت پارت آتا رداٹ تینے تنہا کرینٹ، دا وخت اسکان کنا ٹیسٹ پورو متنے، شام آ بریک رپورٹ نا بننگ آن پد تینا جانجوڑی نا بابت اپ ڈیٹ کیوہ۔