پی ایس ایل اٹ گوازی گرتا و ٹیم تا کارکڑد

لاہور / کراچی (مانیٹرنگ ڈیسک) پی ایس ایل فائیو اٹ دا وخت اسکان کراچی کنگز نا بابر اعظم نا بیٹنگ اٹ 345رنز جوڑ مسنو او کوئٹہ گلیڈی ایٹرز نا محمد حسنین کل آن زیات 15وکٹ دوئی کننگ اٹ سرسہب سلیس۔ تلار حوال کار پی ایس ایل نا ایلو میچ آتا چٹفنگ نا فیصلہ غان پد گوازی گر و ٹیم تا کارکڑد نا بابت اٹ رپورٹ اس جوڑ کرینے ہرانا رداٹ کراچی کنگز نا بابر اعظم 345 رنز کننگ آن پد بیٹسمین تا مہشون اٹ ٹاپ آٹے، وخت اس کہ لاہور قلندرز نا کرس لین 284 رنز اتون ارٹمیکو ایلو کنڈ آ اسلام آباد یونائیٹڈ نا لیوک رونکی و لاہور قلندرز نا بین ڈنک 266 رنز اتون مسٹمیکو نمبر آ ساڑی ءُ۔ کل آن زیات 113 رنز جوڑ کروک آ اسہ گوازی گر نا ریکارڈ ہم لاہور قلندرز نا کرس لین نا پن آٹے، پشاور زلمی نا کامران اکمل 101 رنز اتون ارٹمیکو وخت اس کہ ملتان سلطانز نا ریلی روسوو 100 رنز تون مسٹمیکو نمبر آ ساڑی ءِ، او پاکستان سپر لیگ اٹ ترند انگا سنچری جوڑ کننگ نا ریکارڈ ءِ ہم تینا پن آ کرے۔ کل آن زیات 23 سکس خلنگ نا اعزاز لاہور قلندرز نا بین ڈنک نا پن آٹے، لاہور قلندرز نا کرس لین و کراچی کنگز نا شرجیل خان 16، 16 سکس انا جتا جتا ارٹمیکو و مسٹمیکو نمبر آ ساڑی ءُ۔ ہندن کل آن زیات 155 رنز نا پارٹنرشپ لاہور قلندرز نا بین ڈنک و سمت پٹیل نا نیام اٹ مس۔ کراچی کنگز نا شرجیل خان و بابر اعظم 151 رنز جوڑ کرسا ارٹمیکو نمبر ءِ تینا پن آ کرینو۔ لیگ اٹی کل آن زیات 209 رنز جوڑ کننگ نا ریکارڈ ہم لاہور قلندرز نا پن اتون نوشتہ ءِ۔ قلندرز دا اعزاز ءِ قذافی اسٹیڈیم اٹ کوئٹہ گلیڈی ایٹرز نا برخلاف جوڑ کرے، کراچی کنگز 201 رنز جوڑ کننگ آن پد ارٹمیکو و ملتان سلطانز نا ٹیم 199 رنز اتون مسٹمیکو نمبر آ ساڑی ءِ۔ کوئٹہ گلیڈی ایٹرز نا محمد حسنین کل آن زیات 15 وکٹ دوئی کننگ اٹ سرسہب مس، لاہور قلندرز نا شاہین شاہ آفریدی 13 وکٹ دوئی کننگ آن پد ارٹمیکو و پشاور زلمی نا وہاب ریاض 11 وکٹ اتون مسٹمیکو نمبر ءِ دوئی کرینو۔ لاہور قلندرز نا سمت پیٹیل اسہ ڈائی ٹی بیرہ 5 رنز ترسا 4 وکٹ دوئی کننگ اٹ سرسہب مس، ملتان سلطانز نا سہیل تنویر 13 رنز ترسا 4 وخت اس کہ لاہور قلندرز نا شاہین شاہ آفریدی 18رنز ترسا 4 گوازی گرتے آو ¿ٹ کرے۔ کل آن زیات 8 کیچ ہلنگ نا ریکارڈ کوئٹہ گلیڈی ایٹرز نا محمد نواز نا پن آ مس، پشاور زلمی نا ٹام بینٹن 7 کیچ ہلنگ تون ارٹمیکو و ملتان سلطانز نا جیمز ونس 6 کیچ اتون مسٹمیکو نمبر آٹے۔