بلوچستان نا شونداری حکومتی اولیت آتیٹی اوار ءِ، وزیراعظم شہباز شریف
السی راجی آسراتی کن بنجا و صوبہ غاتے اواری اٹ کاریم کروئی ءِ،سندھ اٹی بنجائی حکومت نا برجا شونداری ڈٹ آتے زوت پورو کننگک، گورنر بلوچستان ملک عبدالولی کاکڑ و وزیر اعلیٰ سندھ اتون جتا جتا ہیت و گپ
Get real time updates directly on you device, subscribe now.
اسلام آباد : وزیراعظم محمد شہباز شریف پارینے کہ بلوچستان نا شونداری و راجی آسراتی بنجائی حکومت نا اولیت آتیٹی اوار ءِ۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم گورنر بلوچستان ملک عبدالولی کاکڑ تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی صوبہ بلوچستان نا انتظامی امور آ گپ وتران و ملک انا جم سیاسی حالیت آتیا ہم گپ وتران کننگا۔ اوڑدہی ٹی وزیراعظم پارے کہ بلوچستان نا شونداری و راجی آسراتی بنجائی حکومت نا اولیت آتیٹی اوار ءِ۔ بلوچستان نا شونداری آن بیدس پاکستان نا شونداری بے پورو ءِ۔ داکان بیدس وزیراعظم محمد شہباز شریف سندھ اٹی بنجائی حکومت نا برجا شونداری ڈٹ آتے زوت آن زوت پورو کننگ نا باوری کرفسا پارینے کہ السی راجی آسراتی کن بنجا و صوبہ غاتے اواری اٹ کاریم کروئی ءِ۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون وزیراعلیٰ سندھ سید مراد علی شاہ پنچ شنبے نادے آ داڑے اوڑدہی کرے ہراٹی سندھ انا بابت امور تیا گپ وتران کننگا۔ اوڑدہی ٹی بنجائی وزیر ڈٹ بندی احسن اقبال و بنجائی وزیر اقتصادی امور سردار ایاز صادق ئسک ہم ساڑی ئسر۔ اوڑدہی ٹی ملک انا جم سیاسی حالیت آتیا ہم گپ وتران کننگا۔ وزیراعظم پارے کہ الی راجی آسراتی کن بنجا و صوبہ غاتے اواری اٹ کاریم کروئی ءِ۔ صوبہ سندھ اٹی بنجائی حکومت نا برجا شونداری ڈٹ آتے زوت آن زوت پورو کننگک۔ اوپارے کہ تھرکول نا ڈٹ آن نئے بیرہ ملک اٹی توانائی نا گرج پورو مریک بلکن علاقہ ٹی شونداری نا پوسکن ءُ کسر ملنگک۔ ہندن وزیراعظم محمد شہباز شریف پارینے کہ ورناتے جہانی آب انا بڑزکو تعلیم فراوان کننگ ءِ حکومت اولیت ایتک، حکومت اوفتے اسہ وڑ شونداری نا موقع فراوان کننگ اٹی ءِ۔ پنچ شنبینادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون جہانی تعلیم و تدریس، یونیورسٹی آف لندن نا پرووائس چانسلر پروفیسر میری ستیاسنی اوڑدہی کرے۔ اوڑدہی ٹی چیئرمین ہائر ایجوکیشن کمیشن پاکستان پروفیسر ڈاکٹر مختار احمد و تعلقدار بڑزکو کمامدارآک ہم ساڑی ئسر۔ اوڑدہی ٹی پروفیسر میری ستیاسنی یونیورسٹی آف لندن نا پاکستان اٹی بڑزکو تعلیم نا مون آ دننگ کن گام گیج آتے مون آتخا۔ وزیراعظم یونیورسٹی آف لندن نا دا گام گیج آتا ستاءِ کرے۔ داوخت آ وزیراعظم پارے کہ پاکستان نا ورناتے جہانی آب انا بڑزکو تعلیم تننگ ءِ حکومت اولیت ایتک۔ حکومت ملک انا ورناتے اسہ وڑ شونداری نا موقع فراوان کننگ اٹی ءِ۔ اوپارے کہ حکومت یونیورسٹی تیٹی باصلاحیت ورناتے لیپ ٹاپ فراوان کرسا اوفتے پوسکن آ ٹیکنالوجی تون ہم گرنچ کننگ اٹی ءِ۔ پروفیسر میری ستیاسنی نا پاکستان اٹی بڑزکو تعلیم نا مون آ دننگ کن خذمت ستاکڑزک۔
(اے پی پی)