بلوچستان اٹ دہشت گردی نا برخلاف جنگ فیصلہ ئی ریسہ ٹی ءِ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی ضلع مستونگ اٹی فتنہ الہندوستان نا برخلاف سیکورٹی فورس آتا کارروائی نا ستاءِ کرسا پارینے کہ دہشت گرد آتا برخلاف کارروائی ریاستی ادارہ غاتا ارادگی و کسبی لائخی نا درشانی ءِ۔ وزیراعلیٰ بلوچستان پارے کہ سیکورٹی فورس آک مستونگ اٹی فتنہ الہندوستان نا برخلاف کارروائی نا وخت آ کمانڈر نقیب تون اوار مسہ دہشت گرد ءِ خلسا اہم سرسہبی دوئی کرینو۔ کارروائی نا وخت آ دہشت گرد آتا گاڈی ءِ کواڈ کاپٹر نا کمک اٹ سرسہبی اٹ شست کننگا۔ میر سرفراز بگٹی پارے کہ دہشت گردی نا برخلاف جنگ اٹی سیکورٹی فورس آتا کسبی چاہنداری‘ جیرت و گچین کارروائی ستاکڑزک۔ دہشت گرد آتا برخلاف دا وڑ انا کارروائی دا ارادگی نا درشانی ءِ کہ ریاست امن دشمن واکدارآتے بلوچستان اٹی تینا پراگندہ ارادہ غاتا پورو مننگ نا موکل تفک۔ وزیراعلیٰ پارے کہ بلوچستان نا الس دہشت گردی نا برخلاف جنگ اٹی سیکورٹی فورس آتتون اوار سلوک ءِ۔ امن کن سیکورٹی کارندہ غاتا قربانیک قوم اکن گمرنا سوب ءُ و حکومت دا قربانی تے قدر انا نظر اٹ ہرک۔ میر سرفراز بگٹی پارے کہ دہشت گردی نا برخلاف جنگ فیصلہ ئی ریسہ ٹی ءِ، دہشت گرد آتا برخلاف کارروائی بے فرق آن برجاسلک۔ اخریکو دہشت گرد نا چٹفنگ اسکان ریاست نا ارادگی برجا سلک و امن دشمن زموارآتے ہچ وڑ اٹ سرسہب مننگ کن النگپک۔ ایلو کنڈ آ سرکاری خبر ایجنسی نا ردا ٹ سیکورٹی فورس آتا بلوچستان اٹ فتنہ الہندوستان نا برخلاف کارروائی برجاءِ، سیکورٹی فورس آک ضلع مستونگ اٹ فتنہ الہندوستان نا برخلاف سرسہب کارروائی کرسا کمانڈر نقیب تون اوار 3 دہشتگرد ءِ دوزخی کریر۔ سیکورٹی حوالی نا رداٹ فورس آک کارروائی نا وخت آ فتنہ الہندوستان نا گاڈی ءِ کواڈ کاپٹر نا کمک اٹ سرسہبی اٹ شست کریر و 3 دہشتگرد ءِ دوزخی کریر وخت اس کہ اوفتا گاڈی ہم پورو وڑاٹ بھس مس۔ حوالی نا رداٹ سیکورٹی فورس آک دہشتگردی نا چٹفنگ کن سنبرینگوک ءُ و گڈیکو دہشتگرد نا چٹفنگ اسکان کارروائیک برجاسلرہ۔ بنجائی وزیر داخلہ محسن نقوی پشین نا علاقہ ٹی فتنہ الہندوستان نا دہشت گرد آتا برخلاف سرسہب کارروائی آ کاؤنٹر ٹیررازم ڈیپارٹمنٹ (سی ٹی ڈی) بلوچستان نا ستاءِ کرینے، تینا بیان اٹ وزیر داخلہ وخت آ و گچین کارروائی ٹی 6 دہشت گرد آتے خلنگ آ سی ٹی ڈی نا کسبی چاہنداری نا ستاءِ کرسا پارے کہ ننے تینا بہادر گلزادہ غاتیا گمر ءِ ہرافک دشمن نا پراگندہ ارادہ غاتے بے سہب کرینو، او پارے کہ بلوچستان اٹ امن کن کل ادارہ غاک سنبرینگوک ءُ و قوم انا پورو مخ تفی اٹ امن نا دُشمن آتے پورو چٹفنگ انگ ءِ۔ بنجائی وزیر داخلہ محسن نقوی بلوچستان نا ضلع مستونگ اٹ فتنہ الہندوستان نا دہشت گرد آتا برخلاف سرسہب آپریشن آ سیکورٹی فورس آتے خراج تحسین پیش کرینے، تینا بیان اٹ وزیر داخلہ کمانڈر تون اوار 3 دہشت گرد ءِ دوزخی کننگ آ فورس آتا کسبی لائخی تا ستاءِ کرسا پارے کہ سیکورٹی فورس آک دہشت گرد آتا پراگندہ ارادہ غاتے مش تا کرینو، او دا ارادگی نا درشانی ءِ کرے کہ ملک آن دہشت گردی نا پورو چٹفنگ اسکان سیکورٹی فورس آتا کارروائیک برجاسلرہ و مچ آ قوم دا جنگ اٹ تینا بہادر فورس آتتون اوار سلوک ءِ۔