کنا است خواہی و اولیت ہڑتوم آک تعلیم نا شونداری تون ءُ،جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ کنا کل آن خڑک انگا اولیت و است خواہی تعلیم ءِ۔ ای بھاز زوت اسلامیہ یونیورسٹی نا بنداو ءِ تخنگ کن داڑے دوارہ بریرہ۔ ہندا ارادگی تون گنڈوک مرسا اسلامیہ یونیورسٹی نا جوڑ کننگ کن کروڑ روپئی سیڈ منی تننگ نا پڑو ءِ کیوہ‘ دا بیرہ وختی مالی کمک اس اف بلکہ ننا پوسکن آ چین نا روشنا آخبت کن تعلیم نا کمک اٹ راج ءِ بدل کننگ نا ارادگی نا درشانی ءِ۔ داکان بیدس ای بلوچستان بورڈ آف انٹرمیڈیٹ اینڈ سیکنڈری ایجوکیشن نا ایف ایس سی نا امتحان تے ٹی اسلامیہ کالج نا اولیکو، ارٹمیکو و مسٹمیکو پوزیشن دوئی کروک مسڑ طالب علم آتیکن اسہ اسہ لکھ روپئی نغد انعام نا پڑو ءِ ہم کیوہ۔ دا خیال آتا درشانی ءِ او اسلامیہ گرلز کالج اٹی انجمن اسلامیہ بلوچستان نا کنڈآن اڈ تروک دود انا شریدار آتیان تران کرسا کرے۔دا وخت آ صوبائی وزیر میر عاصم کرد گیلو، سردار یحییٰ خان ناصر، پرنسپل اسلامیہ گرلز کالج پروفیسر شائستہ کاکڑ، محمد نعیم احمد خان تون اوار استاد و طالب علم آتا بھلو کچ اس ساڑی ئس۔ شریدار آتیان تران کرسا گورنر بلوچستان جعفرخان مندوخیل پارے کہ انجمن اسلامیہ نا چاروکی ٹی دا اسہ متبر تعلیمی ادارہ مننگ تون اوار دانا اسہ بھلو شانی ءُ تاریخ اس ہم ارے۔ اسلامیہ بوائز و گرلز اسکولز و کالجز آن ہزار آ بندغ آک فارغ التحصیل مسنو ہرافک زند انا جتا جتا بشخ آتیٹی تینا خذمت آتے سر تننگ اٹی ءُ۔ بانی پاکستان قائد اعظم محمد علی جناح اسلامیہ ہائی اسکول ءِ چنکا علی گڑھ پاریسس۔ آب اٹنگا تعلیم نا بابت اسلامیہ تعلیمی ادارہ نا تینا اسہ جتاءُ کڑد اسے۔ وخت بسنے کہ نن اسلامیہ کالج ءِ اسلامیہ یونیورسٹی نا درجہ ایتن۔ نن اسلامیہ یونیورسٹی نا جوڑ کننگ نا نئے بیرہ منظوری ایتنہ بلکہ یونیورسٹی ءِ سوگو جوڑ کننگ اٹی پبی کڑد ہم ادا کینہ و امریکہ آن ڈونر و ازگار آتے اتیوہ‘ دا وڑ اٹ درس و تدریس نا دا ردوریسہ مستی ہم چلینگک۔ گورنر مندوخیل پارے کہ محکمہ جانجوڑی و تعلیم ءِ پوسکنوڑ خواست آتتون ہمگرنچ کننگ ننا اولیکو اولیت آتیٹی اوار ءِ‘ اومیت ءِ کہ اسلامیہ یونیورسٹی ملک انا ٹاپ یونیورسٹی تا لڑ اٹ اوار مریک۔