نن جنگ بنا کتنن، بیداد نا برخلاف دفاع غا بیوس مسن، ایرانی صدر

تہران، ایرانی صدر مسعود پزشکیان پارینے کہ ایران جنگ بنا کتنے بلکہ امریکہ و اسرائیل نا بیدادی نا برخلاف دفاع غا بیوس مس۔ ایرانی خبر رساں ادارہ ارنا نا رِد اٹ بھارتی ٹی وی ءِ انٹرویو ٹی او امریکی و اسرائیلی جلہو آتے جہانی کانود و انسانی اصول آتا خلاف ورزی گوندا و پارے کہ دا جلہو تیان پد ہم ایرانی قوم پین یکجا مس۔ ایرانی صدر ایران نا ایٹمی پروگرام آ امریکی و اسرائیلی اعتراض آتے مسترد کرسا پارے کہ ‘ایران ایٹمی سلہہ دوئی کننگ نا کوشست کننگ اٹی اف، امریکہ و اسرائیل مذاکرات نا وخت آ جلہو کریر، تہران معاہدہ نا خُڑک ئس، ایران اسہ فریم ورک اسے آ امنا کریسس ولے امریکی صدر ٹرمپ اودے مسترد کرے’۔ صدر مسعود پزشکیان متحدہ عرب امارات، سعودی عرب، پاکستان، قطر، روس و چین اتون اوار ایب کیب نا ملک آتتون ایران نا تعلقداری تے سنگتی نا وڑ گوندا و پارے کہ ڈیہہ اٹی امریکی عسکری اڈہ غاک بنداوی ویل ءُ۔