مستونگ: وزیر داخلہ بلوچستان نا اسکواڈ آ سم کاری، 3 کارندہ ٹھپی
Get real time updates directly on you device, subscribe now.
مستونگ اٹی بلوچستان نا وزیرداخلہ میر ضیاء اللہ لانگو نا سیکورٹی اسکواڈ آ سلہہ بند بندغ آک سم کاری کریر، ولے وزیر داخلہ جلہو اٹی بچا۔ حوالی نا رداٹ میر ضیاء اللہ لانگو قلات آن کوئٹہ غا بسکہ کہ مستونگ نا علاقہ ٹی اونا سیکورٹی اسکواڈ/اسکارٹ آ سلہہ بند بندغ آک سم کاری کریر، ہراکان پد سیکورٹی کارندہ و جلہوکروک آتا نیام اٹ سم کاری مس۔ ہڑتوم آ کنڈآن سم کاری ٹی اے ٹی ایف نا 3 کارندہ نصر اللہ، سمیع اللہ و زکریا ٹھپی مسر۔ کل ٹھپی تے نواب غوث بخش ہسپتال مستونگ اٹی بنائی طبی کمک فراوان کننگ آن پد مستی درمان کن کوئٹہ غا گدریفنگا۔ کمامدار آتا رد اٹ ٹھپی کارندہ غاتا حالیت جوان ءِ و اوفتے ہچ ءُ خطرہ اس اف۔