لورالائی ٹی یومِ آزادی نا دود، ڈپٹی کمشنر بیرک چست کرے

ورالائی ئی ٹی پاکستان نا 79 می یومِ آزادی ملی جوش و جوزہ، قومی یکجہتی و وطن تون مہر انا قول اتون اوار اڈ تننگا۔ دا رد اٹ ضلعی انتظامیہ نا کنڈآن ڈپٹی کمشنر آفس لورالائی ٹی اسہ شرفدار ءُ دود اسے نا بست و بند کننگا، ہراٹی ڈپٹی کمشنر لورالائی کیپٹن (ر) محمد حسیب شجاع پولیس نا دستہ تون اوار قومی بیرک ءِ چست کرے۔ دود انا وخت آ قومی ترانہ نا توار اٹی پولیس نا سنبرینگوک دستہ قومی بیرک ءِ سلامی پیش کرے، وخت اس کہ بشخ ہلوک آک ملک انا سلامتی، سوگوی، شون و شونہالی کن خصوصی دعا کریر۔ قومی بیرک نا چست کننگ نا دا شرفدار آ ندارہ دود اٹ بشخ ہلوک بندغ آتا حب الوطنی نا جوزہ ءِ پین پیدوار کرے۔ دود اٹ ایس ایس پی ڈاکٹر فہد احمد، ایڈیشنل ڈپٹی کمشنر ریونیو محمد اسماعیل منیگل، اسسٹنٹ کمشنر لورالائی ندیم اکرم، ایڈیشنل ڈپٹی کمشنر جنرل نواز علی جمالی، ڈپٹی ڈائریکٹر اسپورٹس نصیب اللہ کاکڑ، ڈسٹرکٹ ایجوکیشن آفیسر بختیار کاکڑ، ڈسٹرکٹ اسپورٹس آفیسر ظہیر احمد بلوچ، انجمن تاجران نا نمائندہ، کل ضلعی محکمہ غاتا افسر، کارندہ و ایلو شرفمند آک بشخ ہلکر۔