پاکستان لکھ آ مسلمان آتا جہد و قربانی تا رند اٹ دوئی مسنے،میر محمد عاصم کرد گیلو

بولان/ ڈھاڈر، ملک نا ایلو ہند آتا وڑ ضلع کچھی نا صدر مقام ڈھاڈر اٹی ہم پاکستان نا 79 می یومِ آزادی جوش و جوزہ و حب الوطنی اٹ اڈ تننگا‘ یومِ آزادی نا بنجائی دود ڈپٹی کمشنر آفس ڈھاڈر نا چمنی ٹی اڈ ہلک ہراڑے صوبائی وزیر بورڈ آف ریونیو میر محمد عاصم کرد گیلو، مسکوہی صوبائی وزیر میر ماجد ابڑو، ڈپٹی کمشنر کچھی ممتاز علی کھیتران تون اوار ایلو شرفمند و قبائلی متبر‘ ضلعی افسر و شاریک بھلو کچ اسے ٹی بشخ ہلکر۔ دود انا باقاعدہ بناء بیرک چست کننگ آن مس‘ صوبائی وزیر میر محمد عاصم کرد گیلو، ڈپٹی کمشنر کچھی ممتاز علی کھیتران و ایلو مہمانک بیرک چست کریر۔ دا وخت آ پولیس نا سنبرینگوک دستہ بیرک ءِ سلامی تس۔ اوکان پد دود آن تران کرسا صوبائی وزیر بورڈ آف ریونیو میر محمد عاصم کرد گیلو، مسکوہی صوبائی وزیر میر ماجد ابڑو، ڈپٹی کمشنر کچھی ممتاز علی کھیتران و ایلو ترانکار آک پاریر کہ آجوئی اسہ عظیم ءُ نعمت اسے ہرانا دوئی کن ننا کماش آک بے کچ قربانیک تسر۔ پاکستان لکھ آ مسلمان آتا جہد و قربانی تا رند اٹ دوئی مسنے ہندا سوب آن ننے آجوئی نا نعمت نا قدر کروئی مریک‘ او پاریر کہ یومِ آزادی بیرہ جشن اڈ تننگ نا دے اف بلکہ دا دے ننے دا قول انا دوارگی نا وارخواہی فراوان کیک کہ نن ملک انا شون، شونہالی‘ امن و سوگوی کن تینا کڑد ءِ ادا کین۔ او ورنا چین آ زور شاغار کہ او تعلیم نا دوئی کننگ آ خاص چکار کرسا ملک و قوم انا تعمیر و شون اٹی تینا کڑد ءِ ادا کیر۔ دا وخت آ جشن آزادی نا کیک ہم کاٹ کننگا۔ ہنداوڑ ہندی اسکول اٹی ہم یومِ آزادی نا رد اٹ سادہ و شرفدار ءُ دود اس اڈہلک۔ دود اٹ طالب علم آک یومِ آزادی نا رد اٹ تران، ملی نغمہ، ٹیبلو و ایلو چندی پروگرام آتے پیش کریر۔ دود آن تران کرسا ڈپٹی کمشنر کچھی ممتاز علی کھیتران و ڈی ای او کچھی بیگ محمد رئیسانی پاریر کہ پوسکن آ چین ءِ پاکستان نا تاریخ، تحریکِ آزادی و ننا قومی ہیرو تا قربانی تیان معلومدار کننگ وخت نا اہم ءُ گرج اسے۔ او پاریر کہ طالب علم آک ملک نا آخبت ءُ و اوفتے خواری، دیانتداری، نظم و ضبط و تعلیم نا کمک اٹ ملک انا شونداری ٹی تینا کڑد ءِ ادا کروئی مریک۔ دود انا اخیر اٹ ڈی سی کچھی وایلو مہمانک جتا پروگرام تیٹی نمان کارکڑد نشان تروک طالب علم آتے ٹی انعام بشخ وپانٹ کریر۔ (نامہ نگار سمیع اللہ جلبانی)