عدالت نا حکومت ءِ شوگو مل آتا برخلاف کارروائی نا موکل

اسلام آباد (آن لائن) سپریم کورٹ حکومت ءِ شوگر مل آتا برخلاف کاروائی نا موکل تننگ تون اوار حکومتی شوگر کمیشن نا برخلاف سندھ ہائی کورٹ نا حکم امتناع ءِ کشنگ نا پارسا حکومت و ادارہ غاتا کانود نا رداٹ کاروائی نا موکل تسنے۔ کیس انا سماعت چیف جسٹس نا کماشی ٹی مسہ باسکی بینچ کرے۔ سماعت نا وخت آ اٹارنی جنرل عدالت ءِ پارینے کہ دا اولیکو کمیشن ءِ ہراٹی اِرا وزیر اعلیٰ پیش مسر، وزیراعظم نا خڑک انا سنگت اسے ہم کمیشن اٹ پیش مروئی تما۔ مگہ 20 شوگر مل آسمان آن بسنو ہرافتا برخلاف کارروائی مننگ کپک، حکومت بورہ آن پد پٹرولیم بحران آ ہم کمیشن اس جوڑ کننگ اٹی ءِ، سندھ ہائی کورٹ ہراوڑ کارروائی آن تورے او کانود نا برخلاف ءِ۔ شوگر مل آتا وکیل مخدوم علی خان پارینے کہ حکومتی وزیرک بیان بازی کرسا میڈیا ٹرائل کیرہ، حکم امتناع خارج مس تو ہائی کورٹ اٹ کیس زہمی مریک۔ چیف جسٹس ریمارکس ترسا پارینے کہ بیان بازی سیاسی ءُ معاملہ اسے زیات مداخلت کننگ کپسہ، نہ ہی عدالت حکومت ءِ کاریم کننگ آن تورک۔ جسٹس اعجاز الاحسن اسہ وخت اس پارے کہ سفائی ٹی کاریم مرے تاکہ اختہ انگا بندغ آتا برخلاف کارروائی مرے۔ تکنیکی معاملہ غاتیٹی اُلس نا مفاد ءِ پدی توننگ کن ہلیپنہ۔ عدالت شوگر کمیشن رپورٹ آ حکومتی کمامدار آتے بیان بازی آن ہم تورسا سندھ و اسلام آباد ہائی کورٹ آتے مسہ ہفتہ ٹی شوگر مل آتا درخواست آ فیصلہ تننگ تون اوار حکومت ءِ شوگر مل آتا برخلاف کارروائی نا موکل ترسا کیس ءِ سر تس۔