قطر اینخو جہانی اسنوکر چمپئن شپ نا مہمانداری ءِ کیک

 کراچی(مانیٹرنگ ڈیسک) قطر اینخو جہانی اسنوکر چمپئن شپ تون اوار کیہی انٹرنیشنل مقابلہ غاتا مہمانداری ءِ کینہ۔ سال آ جہانی جونیئر اسنوکر چمپئن شپ نا مقابلہ غاتیکن آسٹریلیا و روس مہمانداری نا سلاہ خلکنے۔ دا ہیت انا فیصلہ ءِ  انٹرنیشنل بلیئرڈ اینڈ اسنوکر فیڈریشن (آئی بی ایس ایف) نا ٹیلی کانفرنس اٹ کننگا۔ ایشین کنفیڈریشن بلیرڈ اینڈ اسپورٹس نا سینئر نائب صدر و پاکستان اسنوکر اینڈ بلیئرڈز ایسوسی ایشن نا چیئرمین عالمگیر شیخ ٹیلی کانفرنس اٹ پاکستان نا نمائندگی ءِ کرینے۔ ٹیلی کانفرنس اٹ قطر اینکو انٹرنیشنل ایونٹس مقابلہ غاتا مہمانداری نا سلاہ خلکنے۔فیصلہ غاتا رداٹ نومبر، دسمبر اٹ جہانی اسنوکر چمپئن شپ اٹ مینز، ویمنز و ماسٹر ایونٹس قطر نا شار دوحا ٹی مریرہ۔ جہانی بلئیرڈ چمپئن شپ نا مہمانداری ہم قطر ءِ رسینگا۔ ایلو کنڈ آ آئی بی ایس ایف ٹیم و سکس ریڈ بال چمپئن شپ ہم دبئی آن قطر آکننگانے۔ قطر اینخو جہانی انڈر 18 و ورلڈ انڈر 21 چمپئن شپ نا ہم مہمانداری ہم کیک۔ ہندا سال  نومبر دسمبر اٹ آئی بی ایس ایف نا جنرل کونسل نا دیوان ہم قطر اٹ مریک۔ دیوان آن پد آئی بی ایس ایف نا گچین کاری 2020ء ہم مریک۔ داڑان بیدس آسٹریلیا و روس سال آ جہانی انڈر 18  و انڈر 21 نا مہمانداری نا سلاہ ءِ خلکنے۔ آئی بی ایس ایف نا 15 اگست آ ایلو ٹیلی کانفرنس اٹ پین فیصلہ گمان اٹ اریر۔