پاکستان اٹ ہاکی نا بحالی کن ٹی 20کرکٹ نا وڑاٹ فائیو اے سائیڈ ہاکی مقابلہ غاتا ڈٹ بندی

لاہور(مانیٹرنگ ڈیسک) پاکستان اٹ ہاکی نا بحالی کن ٹی ٹونٹی کرکٹ نا وڑ اٹ فائیو اے سائیڈ ہاکی مقابلہ غاتیکن ڈٹ بندی کننگانے او دا بابت اٹ بروک آ تُو ڈومیسٹک فائیو اے سائیڈ ٹورنامنٹ کرفنگ نا فیصلہ کننگانے۔ پاکستان ہاکی فیڈریشن نا سیکرٹری آصف باجوہ ہیت وگپ کرسا پارینے کہ انٹرنیشنل ہاکی فیڈریشن ہاکی نا گوازی کن فائیو اے سائیڈ ہاکی ءِ جوان وڑاٹ درستی راستی کرفنگ خوارہ تے او دا  فارمیٹ ننکن بھاز کمکار مریک۔ او مستی پارینے کہ پرو لیگ اٹ جرمنی و بلیجئیم نا میچ آک  شیڈول آن بیدس جہانی کہول آ ہاکی سرگرمی تے بحال کننگ نا اومیت ودی مسنے۔ ننے ایف آئی ایچ، اے ایچ ایف و ایلو فیڈریشن تیان لیٹر دوئی مسنے او ننا کوشست ءِ کہ ہراڑے ممکن مرے ہمو  ایس او پیک تون اوار ہاکی بحال مرے۔ او پارینے کہ بروک آ تُو اگست نا گڈسراٹ فائیو اے سائیڈ ہاکی ٹورنامنٹ نا ڈٹ اس جوڑ کننگ اٹی ءُ، فائیواے سائیڈ فارمیٹ ہاکی نا آخبت ءِ ہندا سوب آن داڑا داسی آن سجفنگ نا گرج ءِ۔