کوئٹہ‘ گاہی خان چوک آ اراپڑک نا نیام اٹ جنگ‘پنچ بندغ زوال‘ ہشت ٹھپی

کوئٹہ : کوئٹہ ناعلاقہ سریاب روڈ گاہی خان چوک آ اِرا پڑک نا نیام اٹ جنگ انا سوب آن پنچ بندغ زوال مسر وخت اس کہ اسہ نیاڑی سے تون اوار 8بندغ ٹھپی مسر‘ زوال مروک آتے ٹی چار ایلم ہم اوار ءُ۔ سم کاری آن علاقہ ٹی خلیس وبھیم تالان مس‘ سم کاری نا ڈہ رسینگ آ پولیس جاگہ غا سرمس و ٹھپی و لاش تے ہسپتال گدریفے‘ حوال نا رد اٹ تدوک آ نن کوئٹہ نا علاقہ سریاب اٹ گاہی خان چوک انا خڑک آ ارا پڑک نا نیام اٹ جنگ آن ذوالفقار‘ غلام فاروق، محمددین، محمدحنیف، نصراللہ زوال مسر وخت اس کہ ٹھپی تے ٹی عبدالوحید، احمددین، بابل، حاجی شاہ نواز، جلال، مزمل، شیر محمد واسہ نادرست نیاڑی اس اوار ءِ‘زوال مروک آتے ٹی چار حقی ءُ ایلم و ایلو مسہ ایلم ٹھپی ءُ‘ واقعہ نا ڈہ رسینگ آ پولیس جاگہ غا سر مرسا علاقہ ءِ گھیڑ کرے‘ لاش وٹھپی تے ہسپتال آ گدریفے‘ لاش تے المی کارروائی آن گڈ اوفتا وارث آتے تننگا۔ مستی کاروائی کیچی بیگ پولیس کننگ اٹی ءِ۔

(آن لائن)