احساس پروگرام نا شڑت آتیان حقدار آتا حق خلنگ انگ ءِ ، وزیر خان مینگل

نوشکے : بلوچستان نیشنل پارٹی نابنجائی کمیٹی نا باسک حاجی میر وزیر خان مینگل پارینے کہ حکومت نا کنڈآن احساس پروگرام کن کیہی شڑت و وڑوڈول آن ہزار آ غریب آتا حق خلنگ انگ ءِ و اوفتتون بے انصافی نا سوب ودی مننگ ءِ ۔ او پارے کہ اسہ کنڈآ بلوچستان نا ہزار آ بے روزگار آک خڑک انا ہمسائے ملک آتے ٹی ویزہ اٹ دیہاڑی و پین چنکو کاریم کرسا تینا اُراتے چلیفیرہ‘ ولے کورونا سوب آن ہمو ملک آک اوفتیکن روزگار نا درگہ ءِ بند کرسا اوفتے خورک دو پدی راہی کریر ہرانا سوب آن اینو نوشکے تون اوار مچ آبلوچستان اٹ ہزار آ خاہوت آتا دیگدانک پدین مسنو و بندغ آک باہ انا باخو نا آہری مسنو۔ داسہ اوفتے بیرہ پاسپورٹ مننگ ناسوب آن شونہال بندغ آتے ٹی اوار کرسا اوفتے احساس پروگرام نا کمک آن محروم کننگ انگ ءِ ہراکہ بیدادی و بے انصافی اسے وخت اس کہ ایلو کنڈآ احساس پروگرام اٹ درج کرفنگ کن ہرا وڑ وڈول ءِ تخنگانے او پدتموک و بلوچستان نا الس نا راجی و زرگزرانی و ڈغاری راستکی تیان چَپ ءِ انتئے کہ بلوچستان نا 80 درسَد آبادی بجلی و انٹرنیٹ نا آسودہی آن محروم ءِ او تینا پن تے آن لائن درج کرفنگ کپسہ و لاک ڈاﺅن اٹ ٹرانسپورٹ نا بند مننگ ناسوب آن بھاز کم بندغ آک انتظامی ہند آتسکان سر مننگ کیرہ ہندا سوب آن مشکل اٹ بلوچستان نا 5 آن 10 درسَد آبادی حکومت نا احساس پروگرام آن فائدہ ہرفنگ کیک ایلو کل محروم مریرہ۔

(تلار حوالکار)