دُز عمران نیازی ملک اٹی خانہ جنگی و بے چیٹی خواہک، مریم اورنگزیب

اسلام آباد : بنجائی وزیرحوالکاری وشینکاری مریم اورنگزیب چیئرمین پی ٹی آئی عمران خان آ تنقید کرسا پارینے کہ منافق، بدیانت، توشہ خانہ دز عمران نیازی ملک اٹ خانہ جنگی و بے چیٹی خواہک‘ حکومت نا عمران خان نا دزگیری تون ہچ ءُ تعلقداری اس اف اوڑا جج انا توہین نا کیس ءِ، پی ٹی آئی سیاسی جماعت آخا دہشتگرد آتا ٹولی اسے۔ اسلام آباد اٹ پریس کانفرنس کرسا حوالکاری وزیر پارے کہ حکومت نا عمران خان نا دزگیری تون ہچ ءُ تعلقداری اس اف‘ اوڑا توہین جج انا کیس اسے و عدالت اونا دزگیری نا وارنٹ ءِ جاری کرینے کہ عمران خان ءِ دزگیر کرسا عدالت اٹ پیش کننگے۔ عمران خان ءِ بایدے سما مرے کہ ہرکس خلیس سمجھہ کسک۔ اِرا بیرک نانیام اٹ تولسا دا تاثر تننگ اٹی ءِ حکومت اودے دزگیری کننگ اٹی ءِ۔ میڈیا بایدے عمران خان نا دزگیری نا وارنٹ نا بابت مخلوق ءِ پاہے‘ گلگت بلتستان نا فورس ءِ کاریم اٹ اتسا پنجاب پولیس نا کارندہ غاتے ٹھپی کننگ انگ ءِ‘ پولیس تون ہچ ءُ سلہہ اس اف۔ پولیس عدالتی پرمان آ اسہ ڈوہدار اسے دزگیرکننگ اٹی ءِ‘ تینے بہادر خان پاروک آ بندغ اینو کٹ انا کیرغ آن ڈکوک ءِ‘ اودے تو امریکہ تون جنگ کروئی ئس‘ ای پیدوار کننگ خواوہ کہ عمران خان ڈوہدار اسے‘ اودے عدالت بٹنگانے‘ عدالت اگہ دا بندغ ءِ آئینی پرغنگ آ دزگیر کریکہ تو اینو دا دے بتوکہ۔ ہراتم او بے پتی ناتحریک ءِ بے سہب کننگ کن قومی اسمبلی ءِ پرغا۔ عدالت اودے 25 مئی آدزگیر کننگ نا پرمان کریکہ ہرادے آ او ملک اٹ بے چیٹی تالان کرے و لاش بٹے۔

(آن لائن)