پشاور‘ بی آر ٹی ڈٹ ڈَول نا بنا

0

Get real time updates directly on you device, subscribe now.

 پشاور ( آن لائن ) وزیراعظم عمران خان صوبہ خیبرپختونخوا نا دارالحکومت پشاور اٹ بس ریپڈ ٹرانزٹ (بی آر ٹی) منصوبہ نا بنا ءِ کرے۔ حوال نا رداٹ وزیراعظم عمران خان تدوک آ دے اسہ دے ئی دورہ غا پشاور ءِ سرمس ہراڑے او چمکنی اسٹیشن آن بی آر ٹی بس ڈٹ انا بنا ءِ کرے۔ او وخت آ مسکوہی وزیراعلیٰ پرویز خٹک، وزیر اعلی خیبرپختونخوا محمود خان، صوبائی وزیرک و ڈاکٹر ثانیہ نشتر ہم وزیراعظم تون اوار ئس۔ افتتاح نا وخت آ دود آن تران کرسا او پارینے کہ دا پاکستان اٹ کل آن جوان انگا میٹرو بس سروس ڈٹ ءِ او دا تھرڈ جنریشن ءِ ہرانا اثرک پشاور اٹ تمرہ۔ او پارینے کہ دا ڈٹ آن ٹریفک نا ویل ہم ایسر مریک، دانا بنجائی مرکزی کوریڈور 27 کلومیٹر ءِ وخت اس کہ فیڈرک روٹ 60 کلو میٹر ءِ ہراڑان مچ آ پشاور کور مریک و شار اکن دا اسہ پُوسکن ءُ ڈٹ اسے۔ شونداری ٹی دا اولیکو مرحلہ مریک ہراتم پُوسکن ءُ سفری نظام اس تننگک۔ عمران خان پارینے کہ کنے دا ڈٹ آ گڑاس ویل ئس ولے ای اینو پرویز خٹک ءِ خراج تحسین پیش کننگ خواوہ و پاوہ کہ نن رد ئسن و نم سہی ئسر ءِ۔ بس انا کرایہ غا ہیت کرسا عمران خان پاریسُس کہ وزیراعلیٰ محمود خان ہرا کرایہ ءِ تخانے و سہی ءِ، ننا ہر پروگرام اٹ دا بایدے مرے کہ عام ءُ بندغ اسے نا زند ءِ امر جوان کننگے۔ او پارینے کہ کم از کم 10 و زیات آن زیات 50 روپئی ٹکٹ ہر اسٹ نا برداشت اٹی ارے و اودے مزور و عام انگا بندغ آتے کمک رسینگک۔ ہیت ءِ برجا تخسا او پارینے کہ دا ڈٹ آ طالبعلم آتے ہم فائدہ رسینگک و اُلس ءِ ہسپتال آتیا ہننگ آ ہم کمک رسینگک او دا ڈٹ آن پشاور اٹ نما ہر اسٹ نا کٹ ہم ودک او شار انا ٹرانسپورٹ اٹ جوانی بریک۔ گڈ سر اٹ او پارینے کہ دا ڈٹ انا بس آک ہائبرڈ ءُ ہراڑان پشاور اٹ دنز انا کہول کم مریک۔ بنا آن مست وزیراعظم عمران خان ضلع خیبر اٹ چنا ءِ پولیو آن بچفنگ نا پڑی ہم کنفنگا وخت اس کہ نیال تخنگ مہم نا رداٹ پُل ہم خلکر و احساس نشوونما پروگرام جاری کرے۔

Get real time updates directly on you device, subscribe now.

Leave A Reply

Your email address will not be published.