بھلاک کڑد ادا کریر‘ ورناک ملک انا شونداری کن کاریم کیر‘گورنر بلوچستان

0

Get real time updates directly on you device, subscribe now.

کوئٹہ (خ ن) گورنربلوچستان امان اللہ یاسین زئی یوم آزادی پاکستان ناوخت آ تینا کلہو اٹ پارینے کہ اینو پاکستان نا جوڑ مننگ ناسال دے آ آجوئی نا جشن اڈ تننگ اٹی ان۔ ہندا ہمو دے ءِ ہراتم پاکستان اسہ آجو و وتواجہ ءُ ریاست اسے نا حیثیت اٹ جوڑ مسوسس و برصغیر نا مسلمانک غلامی آن خلاسی دوئی کریسر۔ او پارے کہ دا مسخت کن ننا بزرگ آک بھلو جہد و بھاز قربانی ترسا دا نعمت ءِ دوئی کریر۔ اوپارے کہ اینو نا دے آ نن آجوئی نا تحریک نا شہید و غازی تے خراجِ عقیدت پیش کینہ ہرافک تینٹ تکلیف ہرفسا ننے کن دا وطن ءِ دوئی کریر۔ گورنر بلوچستان پارے کہ او تو تینا فرض ءِ پورو کریر داسہ دا ننا و خاص وڑ اٹ ورناتا زمواری ءِ کہ دا آجوئی ءِ مدام برجا تخر و وطن عزیز نا سلامتی‘ شرف‘ شونداری کن است انا سِخت‘ حوصلہ اٹ عملی کاریم کیر۔اوپارے کہ اینو ملک انا ہرا حالیت آک ءُ او دا ہیت انا خواست ءِ کیرہ کہ مچ آ قوم اسہ وار ولدا تینے ٹی ہمو جوزہ‘ سیوت‘ و یکجہتی ءِ ودی کے ہرانا درشانی ءِ تحریک پاکستان نا وخت آ کننگاسس تاکہ نن کل اسیجائی اٹ و تینا اختلاف آتے چٹفسا ملک انا سالمیت‘ تعمیروشونداری کن کاریم کین۔ او دعا کرے کہ اللہ تعالیٰ دا ملک انا رکھ ءِ کے و ننے تینا وطن نا خذمت کننگ نا ہمت و توفیق ایتے۔داکان بیدس وزیراعلیٰ بلوچستان جام کمال خان 73 می یوم آزادی نا وخت آ قوم ءِ مبارکباد پیش کرسا پارینے کہ ای یوم آزادی نا رداٹ ملک و قوم انا رکھ و امن کن جان تے ندر کروک آ شہید آتے خراج عقیدت پیش کیوہ و تینا کشمیری ایلم تا تحریک آزادی نا سرسہبی کن نیک است خواہی تا درشانی ءِ کیوہ۔ داخیال آتا درشانی ءِ او جشن آزادی نا وخت آ قوم انا پن تینا اسہ ویڈیو کلہو اسے ٹی کرے۔ وزیراعلیٰ بلوچستان جام کمال خان دعا کرے کہ اللہ تعالیٰ ننا ملک ءِ مدام خرُن تخے۔ پاکستان و بلوچستان و صوبہ نا شونداری و شونہالی کن دعا کیوہ، پاکستان زندہ باد، پاکستانی قوم پائندہ باد۔

Get real time updates directly on you device, subscribe now.

Leave A Reply

Your email address will not be published.