وطن نا شونداری کن نن تینا ہر گڑاءِ ندر کینہ‘میرضیاءاللہ لانگو

کوئٹہ (خ ن) صوبائی وزیر داخلہ و قبائلی امور و پی ڈی ایم اے میر ضیاءاللہ لانگو یوم آزادی پاکستان نارد اٹ قوم ءِ مبارکبادی ترسا تینا کلہو اٹ پارینے کہ آجوئی قوم اسیکن بھاز بھلو نعمت اس مریک‘ آجو چاگڑد اٹ ساہ ہلنگ آن بیدس نن تینا نظریہ وعقیدہ نا پاش وڑ اٹ درشانی ءِ کپننگ کپنہ و نئے تینا بنداوی حق آتا رکھ ءِ کننگ کینہ۔ صوبائی وزیرداخلہ میر ضیاءاللہ لانگو پارے کہ یوم آزادی پاکستان نا دے آ نن دا عہد کینہ کہ نن تینا ہرا گڑا ءِ ندر کرسا دا وطن عزیز ءِ شونداری نا کسر آ روان کرسا ایمان اتحاد و تنظیم نا خیالداری ءِ کینہ۔ عرض پاک نا شونداری وشونہالی کن المی ءِ کہ نن اسیجائی ات کوشست کرسا تینا کڑد ءِ ادا کین‘ دا دے انا دود آک دُنکہ بیرک چست کننگ‘ قومی ترانہ، پریڈ، اعزاز تننگ و ترانکاری دود اڈ تننگ نا مسخت ہم ہندا مریک کہ نن تینا عہد وفا ٹی پوسکن ءُ ساہ اس شاغسا پوسکن آ جوزہ اٹ ملک وقوم اناخذمت ءِ کین۔