یونیورسٹی نا تعلیم راج انا شونداری ٹی اہم ءُ کڑد ادا کیک، گورنر بلوچستان

کوئٹہ : گورنر بلوچستان ملک عبدالولی خان کاکڑ پارینے کہ یونیورسٹی بنداوی وڑ اٹ پوسکن آ چین اکن تعلیم وہیلکاری نا بڑزکو ہندجاٹ ءِ‘ دا رد اٹ یونیورسٹی آف لورالائی نا جوڑ کننگ لورالائی و اوڑان خڑک انا علاقہ غاتا ورناتے بڑزکو تعلیم دوئی کننگ اٹ بنداوی کڑدار ادا کیک‘ او یونیورسٹی آف لورالائی نا وائس چانسلر ڈاکٹر مقصود احمد و اونا مچ آ ٹیم انا شعوری کوشست آتا ستاءِ کرے و فارغ مروک مار ومسڑ طالب علم آتے مبارکبادی تس۔ دا خیال آتا درشانی ءِ او سَے شنبے نا دے لورالائی یونیورسٹی نا اولیکو کانووکیشن نا شریدار آتیان تران کرسا کرے‘ ہراٹی کلہو دوسَد دو دَہ طالب علم ءِ گریجویشن نا سَند تننگا ہرافتے ٹی پنجا مسڑ طالب علم ہم اوار ءُ۔ داوخت آ صوبائی اسمبلی نا باسک اختر حسین لانگو، احمد نواز بلوچ، علاقہ نا متبر‘ باوہ لمہ‘ مارومسڑ طالب علم آتا بھلو کچ اس ساڑی ئس۔ لورالائی یونیورسٹی نا اولیکو کانووکیشن نا شریدار آتیان تران کرسا گورنر بلوچستان پارے کہ راج انا گچینی‘ رکھ و شونہالی کن یونیورسٹی نا تعلیم اہم ءِ۔ لورالائی یونیورسٹی نا اولیکو کانووکیشن اٹ بشخ ہلنگ نن کل اکن گمر نا ہیت اسے۔ اوپارے کہ 2012 ٹی جوڑ مروک دا تعلیمی ادارہ اللہ تعالیٰ نا فضل وکرم اٹ داخس لائخ مسنے کہ داکان مار ومسڑ طالب علم آک اعزاز تون اوار گریجویٹ مننگ اٹی ءُ۔ گورنر بلوچستان کل فارغ مروک گریجویٹ‘ اوفتا باوہ لمہ و استاد آتے ہم مبارکبادی تس ہرافک دا تعلیمی سفر اٹ اوفتا پبی وڑ اٹ راہشونی ءِ کریر۔ گورنرپارے کہ اینو نا دے استاد آتا کوشست‘ باوہ لمہ غاتا چکار و مارومسڑ طالب علم آتا خواری تا بھرم ءِ۔ گورنر بلوچستان ملک عبدالولی خان کاکڑ پارے کہ لورالائی یونیورسٹی ءِ ہم ہندا گرج انا رد اٹ جوڑ کننگاسس و 2012 غان ہلیس دا وخت اسکان دا یونیورسٹی نئے بیرہ بلوچستان بلکہ پاکستان اٹ تعلیم نا آب ءِ گچین کننگ و پٹ وپول نا رجحان ءِ شون تننگ اٹ اہم کڑدار ادا کرینے۔ او دا یقین نا درشانی ءِ کہ دا بھلا تعلیمی ادارہ‘ تعلیمی شونداری نا سفر ءِ ہندا وڑ برجا تخک و ڈیہہ ءِ پوسکن آ پٹ وپول و چاہنداری تیان روشنا کننگ اٹ اہم کڑد ادا کیک۔ گورنر بلوچستان پارے کہ بلوچستان نا مر انگا علاقہ غاتا ورناتے بڑزکو تعلیم تننگ تعلیم نا بشخ اٹ انقلاب اسے آن کم اف۔

(خ ن)