جان جوڑی نا بشخ اٹی برٹش ہائی کمشنر نا کمکاری ستا کڑزک، قادر پٹیل

اسلام آباد : بنجائی وزیر جان جوڑی عبدالقادر پٹیل پارینے کہ جان جوڑی نا بشخ اٹی گچینی کن غٹ تر وسیلہ غاتے کاریم اٹ اتنگ اُن، جا ن جوڑی نا بشخ اٹی برٹش ہائی کمشنر نا کمکاری ءِ قدر انا نظر اٹ ہرنہ۔ وزارت جان جوڑی آن جاری بیان نا رداٹ داخیال آتا درشانی ءِ بنجائی وزیر برٹش ہائی کمشنر نا ڈائریکٹر انچارج ڈویلپمنٹ جومایر تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ داوخت آ ڈی جی ہیلتھ ڈاکٹر بصیر اچکزئی ئسک ہم ساڑی ئسر۔ اوڑدہی ٹی عبدالقادر پٹیل نوکاپ نا بھسکاری تیان سندھ و بلوچستان اٹی خاص وڑاٹ جان جوڑی نا بشخ اٹی کمکاری آ برٹش ہائی کمشنر نا منت واری ءِ ہرفے۔ داوخت آ بنجائی وزیر پارے کہ جان جوڑی نا بشخ آ حکومت خاص چکار کننگ اٹی ءِ۔ جان جوڑی نا بشخ اٹی گچینی کن غٹ تروسیلہ غاتے کاریم اٹ اتنگ اُن۔ جان جوڑی نا بشخ اٹی نا کمکاری ءِ قدر انا نظر اٹ ہرنہ۔ اوپارے کہ ننے خلقی کہول آ انفارمیشن مینجمنٹ و دوائی تا سپلائی نا گچینی کن پین گام گیج آتا گرج ءِ۔ غذائی کاختی نا گواچی لمہ و چناتا خور اکن پین گام گیج کننگ نا گرج و کمکاری ہم درکار ءِ۔ عبدالقادر پٹیل محکمہ جان جوڑی نا کارندہ غاتا کاریم نا کچ ءِ ودفنگ نا ہم سفارش کرینے۔ اوڑدہی ٹی ڈائریکٹر انچارج برٹش ہائی کمشنر دا چرجوئی ٹی پبی کمکاری نا باوری کرفے۔ اوپارے کہ لمہ و چنانا جان جوڑی ٹی گچینی کن خصوصی امداد تننگ انگ ءِ۔ نوکاپ نا بھسکاری تیان بچنگ کن جان جوڑی و تعلیم نا بشخ اٹی صوبائی حکومت آتون اواری اٹ پبی کمک کننگ اٹی اُن۔ داکان بیدس وزارت جان جوڑی نا ترجمان پارے کہ تدوک آ دے حکومت برطانیہ نا ادارہ ایف سی ڈی او وزارت جان جوڑی تون اسہ مفاہمت نا یات داشت اسے آ دستخط کرینے۔

(اے پی پی)