چاگڑدی بدلی انسانی زند آتیکن بھاز بھلو خطرہ اسے، شیری رحمان

اسلام آباد : بنجائی وزیر چاگڑدی بدلی شیری رحمان پارینے کہ چاگڑدی بدلی انسانی زند آتیکن بھاز بھلو خطرہ اسے، اوڑان ودی مروک آ ویل آتے ادارہ غاتا تین پہ تینی کمکاری اٹ آسانی اٹ ایسر کننگ مریک۔ دنیا نا بھاز انگا ڈیہہ گلیشیئر نا دیر مننگ و ہیٹ ویوز آن زہمی مننگ اٹی ءُ، بہار نا موسم کم و ود چٹانے۔ سے شنبے نادے آ داڑے نیشنل ڈیزاسٹر مینجمنٹ اتھارٹی (این ڈی ایم اے) نا کنڈآن نیشنل ایمرجنسی آپریشنز سینٹر (این ای او سی) و ایلو بنجائی و صوبائی ایمرجنسی سروس آتا ادارہ غاتا فرضی مشق آتا بنائی سیشن آن تران کرسا بنجائی وزیر شیری رحمان پارے کہ قدرتی آفت آتیان نسخان ءِ کم آن کم کننگ کن تعلقدار ادارہ غاتیٹی ہم آہنگی المی ءِ، قدرتی آفت آتیان پد اولیکو کاریم بنداوی پنجر نا بحالی ءِ۔ اسہ ملک اس ہم قدرتی آفت آتا نسخان بیرہ تینا زی آ سگنگ کپک۔ قدررتی آفت آتیان پد سنگت ملک آک اول کمک کن سرمریرہ۔ شیری رحمان پارے کہ نوکاپ آن پاکستان ءِ بھلو کچ اسے آ نسخان تون مون تروئی تما، زہمی تے ریسکیو و اوفتا بحالی نا کاریم تیٹی این ڈی ایم اے، پی ڈی ایم اے و ایلو ادارہ غاک اواری اٹ کاریم کریر ہراڑا دا ادارہ غاک سفت نا حقدار ءُ۔ اومستی پارے کہ آخبت اٹ آفت آتون مون تننگ کن چندی ادارہ غاتا نیام اٹ کمکاری ءِ ودفنگ نا گرج ءِ۔

(اے پی پی)