کل صوبہ غاتا اواری آن بیدس ملک شون ہلنگ کپک، شہباز شریف

سکھر: وزیراعظم محمد شہباز شریف پارینے کہ سڑک آتا جال اس تالان کننگ آن بیدس شونداری و شونہالی نا تغ پورو مننگ کپک، نواز شریف ملک اٹی موٹروے تا بنداو ءِ تخا، پسماندہ و محروم علاقہ غاتا شونداری آ خاص چکار کننگ انگ ءِ، پبلک پرائیویٹ پارٹنر شپ آن مچ آ ملک اٹی شونداری ڈٹ آتا بناءِ کننگے۔ او سے شنبے نادے آ سکھر حیدرآباد موٹروے ایم 6 نا بنداو ءِتخنگ نا وخت آ اڈ ہلوک دود آن تران کریکہ۔ داوخت آ بنجائی وزیر مریم اورنگزیب، احسن اقبال، اسعد محمود، خورشید شاہ، امین الحق آن بیدس وزیراعلیٰ سندھ سید مراد علی شاہ، قومی و صوبائی اسمبلی نا باسک و علاقہ نا سرکڑدہ غاک ہم ساڑی ئسر۔ داکان مست وزیراعظم تختی نا نقاب کشائی ءِ کرسا ایم 6 موٹروے نا بنداو ءِ تخا۔ دود آن تران کرسا وزیراعظم پارے کہ دااللہ تعالیٰ نا فضل وکرم ءِ کہ ننا مخلوط حکومت دا اہم ڈٹ آتا بنداو ءِ تخنگ ءِ، داڑان سکھر، کراچی و حیدرآباد تون وار مچ آ ملک انا الس ءِ فائدہ مریک و دانا پوروی آن قطب آن سویل موٹروے پورو مریک۔ وزیراعظم پارے کہ دا ڈٹ ءِ 30 تُو انا گونڈ مد اٹی پورو کننگک و 306 کلومیٹر مریس دا شاہراہ غا 307 ارب روپئی نا خڑچ بریک ہراٹی حکومت بیرہ 9 ارب روپئی وخت اس کہ ایلو فنڈ ءِ نجی بشخ فراوان کیک ہرادا شاہراہ نا پوروی آ تینا خڑچ ءِ پورو کننگ آن بیدس منافع ہم کٹیا کیک۔ وزیراعظم پارت کرے کہ داموٹروے نا ہموآب مرے ہرا موٹروے نا ایلو سیکشن تا ءِ۔ داڑان کم آب ءِ قبول کننگپک، داڑکن غٹ تعلقدار وزیر آک و ادارہ غاک تینا غٹ تر کوشست آتے کاریم اٹ اتیر و اسیجائی کوشستآتے اٹ دا ڈٹ انا آب و تخوک آ مد اٹی پوروی ءِ پک کننگے۔ وزیراعظم ملک انا ایلو بشخ آتیٹی ہم پبلک پرائیویٹ پارٹنر شپ نا رداٹ پین ڈٹ آتا بناءِ کننگ نا پارت کرے۔ اووزیراعلیٰ سندھ سید مراد علی شاہ نا کنڈآن سندھ اٹی پبلک پرائیویٹ پارٹنر شپ ماڈل ءِ مون آ دننگ نا ستاءِ کرے۔ وزیراعظم بلوچستان، پنجاب و ایلو صوبہ و حکومت آتیا ہم زور شاغا کہ او دا ماڈل ءِ مون آ دیر انتئے کہ ہنداڑان شونداری و شونہالی نا مزل آتے دوئی کننگ مریک۔ وزیراعظم بنجائی وزیر سید خورشید شاہ نا خواست آ سکھر روہڑی پول ءِ پورو کننگ ناہم پڑو کرے، دا ڈٹ انا مسکوہی وزیراعظم نواز شریف منظوری ءِ تسوسس۔ وزیراعظم بنجائی وزیر سید خورشید شاہ نا خذمت آتا ستاءِ کرسا اونا دراخ جوڑی کن نیک است خواہی نا درشانی ءِ کرے۔ اوپارے کہ پاکستان اٹی موٹروے تا بنداو ءِ نواز شریف تخا، اواونا جوڑکروک آک ءُ۔ وزیراعظم بلوچستان آن اپ کنٹری کنٹیکویٹی آ ترندی اٹ کاریم نا گرج آ زور شاغسا پارے کہ بلوچستان پاکستان نا اہم ءُ صوبہ اسے و دانا شونداری آن بیدس پاکستان نا شونداری بے پورو ءِ۔ اوپارے کہ کنا پارت آ گوادر نا بندرگاہ ءِ آپریشنل کننگ کن خولم گوادر آن خواہفنگ انگ ءِ انتئے کہ ننے پدسلوک آ علاقہ غاتے شون تروئی ءِ۔ وزیراعظم پارے کہ ان لینڈ فریٹ نا خڑچ ودنگ تون اوار چندی وڑنا عذر پیش کننگا ولے نن خولم نا غٹ آن کم بولی تروک آتون ہم نہاد ءِ پین کم کرفسا نئے بیرہ منہ ارب روپئی پین بچفین بلکن گوادر نا کمک اٹ خولم خواہفنگ آن شونداری نا رُمب اٹی پدی سلوک آ علاقہ غاتے ہم فائدہ مننگ ءِ انتئے کہ اگہ پسماندہ علاقہ غاتے شونداری نا رُمب اٹی اوار کتون تو قائد نا پاکستان نا تغ پورو مفک۔ وزیراعظم پیدوار کرے کہ موٹروے تا آب آ ہچ ءُ سمجھوتہ اس کننگپک، غٹ تعلقدار ادارہ غاک آب اٹ تفنگ ءِ پک کیر۔ وزیراعظم دادو، قمبر، شہداد کوٹ تون اوار سندھ انا چندی علاقہ غاتیٹی نوکاپ زہمی تیکن گچین کاریم کننگ آ صوبائی حکومت و پاکستان پیپلزپارٹی نا کماش آتا ستاءِ کرسا پارے کہ داسکان بھاز کاریم کننگ سلوک ءِ، لکھ آ مخلوق بے سروسامان ءُ و بھاز انگا مشکل و چیلنج مون تروک ءِ، تینا مشکل آتیٹی تموک ایڑھ ایلم تے تنیا اِلیپنہ و اوفتے کن انتس کہ وس اٹی مریک کینہ، دا چرجوئی ٹی غٹ وسیلہ غاتے کاریم اٹ اتنگک۔ وزیراعظم زوت نوکاپ آن زہمی علاقہ غاتا دورہ ءِ کننگ نا ہم پڑو کرے و دایخین نا درشانی ءِ کرے کہ حکومت اللہ تعالیٰ نا کرم اٹ ملک ءِ مون تروک چیلنج و مشکل آتیان کشسا شونداری وشونہالی نا کنڈآ دیک۔ داکان مست وزیراعلیٰ سندھ سید مراد علی شاہ پارے کہ اینو اسہ تاریخی ءُ دے اسے، تدوک آ مسہ نیم سال آن دا ڈٹ آکاریم سلوک اسک داسہ ایم 6 آ ہڑتوم آ کنڈآتیان کاریم اسہ وخت اٹی بناکیک۔ اوسکھر حیدرآباد نیشنل ہائی وے نا بحالی کن فنڈ فراوان کننگ و ایم 6 نا ٹول موٹروے نا ایلو سیکشن تا رداٹ مقرر کننگ و ملازمت ہندی مخلوق ءِ فراوان کننگ نا خواست کرے۔

(اے پی پی)