غیر کانودی ٹرالرنگ آ رکھ، دفتر آک کراچی آن گوادر آ گدریفنگرہ

گوادر: چیف سیکرٹری بلوچستان مطہر نیاز رانا پارینے کہ بلوچستان نا سوردریاب اٹی غیر کانودی ٹرالرنگ آ پورو وڑ اٹ رکھ خلنگانے۔ او پارے کہ ای اِرا مسہ دے اسکان گوادر اٹی تولوہ، داڑے مخلوق نا ویل آتے بنوہ۔ بڑزکو کہولی دیوان اٹی چیف سیکرٹری ءِ بریفنگ ہم تننگا۔ وخت اس کہ آل پارٹیز گوادر نا ڈَل چیف سیکرٹری تون اوڑدہی کرے۔ سرجم حوال آتا رد اٹ چیف سیکرٹری بلوچستان نا کماشی ٹی گوادر اٹی بڑزکو کہولی دیوان اس اڈ ہلک، دیوان اٹی کمشنر مکران ڈویژن شبیر مینگل، چیئرمین گوادر بندر گاہ نصیر خان کاشانی، ڈاٹریکٹر جنرل ادارہ شوندری گوادر مجیب الرحمن قمبرانی، ڈپٹی کمشنر گوادر کیپٹن ریٹائرڈ جمیل احمد بلوچ و ایلو بڑزکو کہولی کمامدار آک ساڑی ئسر۔ دیوان اٹی غیر کانودی ٹرالرنگ و غیر کانودی ماہی گیری نا توننگ تون اوار ایلو باندات آتا جاچ ہلنگا، چیف سیکرٹری دیوان اٹی ترند مس، پارے کہ افسر آک تینا لائخی تے جوان کاریم اٹ اتپننگ ءُ، او پارت کرے کہ افسر آک تینا کل لائخی تے مخلوق نا بنداوی آسراتی تا رسیفنگ کن کاریم اٹ اتیر، و مخلوق نا آسودہی و آسراتی کن گا گیج کیر۔ دیوان اٹی فیصلہ کننگا کہ مخلق نا ویل آتا ایسری و اوفتے بنداوی آسراتی تا فراوانی کن کمشنر مکران ہفتہ ٹی مسہ دے گوادر اٹی کیمپ آفس جوڑ کیک و مخلوق نا ویل آتے خف تورک، چیف سیکرٹری پارے کہ غیر کانودی فشنگ نا تننگ کن گام گیج کننگ انگ اٹی ءِ، و بھاز زُو غیر کانودی ٹرالرنگ توننگک۔ چیف سیکرٹری بلوچستان پارے کہ ای گوادر اٹی دیوان کننگ کن بتنٹ، بلکہ داڑے بنگ نا مسخت مخلوق نا بنداوی آسراتی تا فراوانی ءِ پک کننگ ءِ۔ چیف سیکرٹری بلوچستان پارے کہ غیرکانودی ٹرالنگ و غیرکانودی ماہی گیری نا توننگ کن گام گیج کننگ اُن۔ گوادر اٹی زیر تعمیر نیو انٹرنیشنل ایئرپورٹ نا پروجیکٹ ڈائریکٹر آفس گوادر آ گدریفنگ نا پارت کرینن۔ چیف سیکرٹری بلوچستان پارے کہ ہراڈٹ آتیا کاریم ترندی اٹ برجاءِ اوفتے زوت ایسر اسکان سرکننگک۔ مخلوق ءِ بنداوی آسراتی تافراوانی ءِ پک کننگ انگ ءِ۔ گوادر اولڈ سٹی نا تفنگ و جوڑ جاڑ اٹی ہندی مخلوق نا سلابت آتیا عملدرآمد کننگک۔ اوپارے کہ گوادر اٹی اسہ نرسنگ اسکول اسے نا منظوری مسنے بھاز زوت گوادر نرسنگ اسکول اٹ داخلہ و کلاس تا بناءِ کننگک گوادر اٹ کنوئی آ ساف دیر انا فراوانی نا ویل ءِ ایسر کننگانے۔