18می ترمیم نا بابت صوبہ غاتتون فراڈ کننگ انگ ئِ، نواب اسلم رئیسانی

کوئٹہ( آن لائن ) مسکوہی وزیراعلی بلوچستان چیف آف ساراوان نواب محمد اسلم رئیسانی پارینے کہ فیڈریشن ناسوگوی کن صوبہ غاتے حق تروئی مریک‘ جمہوری سوگوی و آئین نا بالادستی کنٹرول آ بندغ آتیان ممکن اف، ریاست مدینہ نا ہیت ئِ کروک آ مسٹر عمران نا کروک آ پڑو و گام گیج آتیٹی جتائی خننگ انگ اٹی ئِ۔ 18 میکو ترمیم اٹ صوبہ غاتون فراڈ کننگ انگ ئِ، بلوچستان نا وسیلہ غاتیان صوبہ ئِ فائدہ تننگ کن جوان ئُ پالیسی نا بھاز گرج ئِ، باپ انا خنک، بِک، خف و جگر خراب مسنو، درمان کننگ کن نن تیار اُن، وزیراعلی کن اپوزیشن جماعت آتا مخ تفی ئِ کینہ اگہ کنا لخ اٹی زمواری خلکر تو خڑک انا حلقہ غاتون سلاہ کیوہ۔ دا خیال آتا درشانی ئِ ”آن لائن” تون ہیت و گپ کرسا کرے، نواب محمد اسلم رئیسانی پارینے کہ قومی آ وحدت آتے زیات اختیار تننگے، داڑے جتا تجا قومک رہنگ انگ اٹی ئُ، ہرافتا جتا جتا زبان، جتا دود ربیدہ ئُ۔ یعنی دا ملٹی نیشنل ئُ اسٹیٹ اسے اگہ نم دادے اسہ اسٹیٹ اس پارے او ہرا قوم تا تاریخ 6 یا 7 ہزار سال مُتکن ئِ تو او 12یا 13 دے اکن تینا تاریخ ئِ اُست آن دپسہ۔ او پارینے کہ ای سمجھوہ کہ پاکستان نا آئینی آٹی ٹی بدلی المی مسنے، داکان مست ہم ایوب خان آن پد 73 نا آئین بس و ولدا 18 میکو ترمیم اتنگا ہرانا نن ہروڑاٹ مخ تفی ئِ تو کینہ ولدا ہم ننے ہچ اس تکپسہ۔ انتئے کہ اینو ہم 18 میکو ترمیم نا بدلہ غاتیان صوبہ غاک پورو وڑاٹ فائدہ ہرفنگ کتنو، گیشتری محکمہ غاتے اینو ہم بنجاہ غان کنٹرول کننگ انگ ئِ۔ او پارینے کہ دا ملک اکن پُوسکن آ عمرانی معاہدہ وخت انا اہم ئُ گرج اسے، ہراٹی مسہ معاملہ غاک دفاع ،خارجہ امور و مالیات بنجاہ تون مریر، آئینی اسٹریکچر ٹی قومی وحدت آتے زیات اختیار تروئی تمک، گچین کاریک پروفیشنل ریپرزینٹیشن نا بنداو آ بایدے مریر ہراوڑ سینیٹ نا گچین کاریک مریرہ، ملکی معاملہ غاتے دا وخت آ جوان وڑاٹ چلیفنگ کیرہ۔