زالبول جج ءِ دھڑکو نا کیس، عمران خان نا وارنٹ دزگیری جاری

اسلام آباد: سول جج جوڈیشل مجسٹریٹ اسلام آباد رانا مجاہد رحیم زالبول جج زیبا چوہدری ءِ دھڑکو تننگ نا کیس اٹی مسکوہی وزیراعظم عمران خان ناناقابل ضمانت وارنٹ دزگیری جاری کرسا 29 مارچ آ پیش کننگ نا پرمان جاری کرے۔ دوشنبے نادے آ عدالت زالبول جج ءِ دھڑکو تننگ نا کیس انا سماعت ءِ کرے۔ سماعت اٹی اینو ہم عمران خان عدالت اٹی پیش متو و سیکورٹی گڑتی تیا حاضری آن استثنیٰ نا درخواست دائر کرے ہرادے عدالت خارج کرے و عمران خان ءِ 29 مارچ اسکان دزگیر کرسا پیش کننگ نا پرمان جاری کرے۔ سماعت اٹی عمران خان نا وکیل نا کنڈآن بریت نا درخواست ہم کننگا ہراڑا عدالت دلیل آتیکن بروک آ سماعت آ فریق آتے نوٹس جاری کرے۔ سماعت اٹی سول جج رانا مجاہد رحیم نا پاننگ ئس کہ عمران خان عدالتی وخت آتیٹی بتو تو ناقابل ضمانت وارنٹ دزگیری جاری کیوہ، عدالت سماعت اٹی وقفہ کرے۔ وقفہ غان پد سماعت بناکرے تو سول جج رانا مجاہد رحیم نا پاننگ ئس عدالت عمران خان ءِ فرد جرم نا کارروائی ءِ مون آ دننگ کن بٹنگانے، داسہ اودے مقدمہ نا کاپی تروئی ءِ، عمران خان نااینو حاضری آن استثنیٰ نا درخواست ءِ خارج کننگ اٹی اُٹ۔ وکیل صفائی انتظار پنجوتھہ نا پاننگ ئسک کہ عمران خان مسکوہی وزیراعظم ءِ، وزیر آباد اٹی اوڑا قاتلانہ جلہو مس، داسکان عمران خان جوان دراخ جوڑ ہم متنے، عمران خان نا اینو حاضری آن استثنیٰ نا درخواستءِ منظور کننگے۔ یات سلے کہ عدالت عمران خان ءِ کیس انا کاپی تننگ کن اینو بٹنگاسس، عمران خان نا ذاتی حیثیت اٹ عدالت اٹ پیش مننگ المی ءِ۔ اوکان پد مقدمہ نا کارروائی ءِ مون آ دننگک۔ زالبول جج ءِ دھڑکو تننگ نا کیس اٹی عمران خان نا برخلاف تھانہ مارگلہ ٹی مقدمہ درج ءِ۔

(اے پی پی)