اردو ادب نا بھلا پن راحت اندوری 70 سال نا وئی اٹ کزیت کرے

ممبئی (مانیٹرنگ ڈیسک) اردو نا جہانی کہول آ پنی آ شاعر راحت اندوری 70 سال نا وئی اٹ کزیت کرے۔ بھارتی میڈیا نا رد اٹ راحت اندوری ءِ کورونا ہلکوسس، و اینو دا حوال پک مسوسس۔ اونا بھارتی شار اندور نا ہسپتال اٹی درمان مسکہ۔ اردو مشاعرہ غاتا جان تکنگوک راحت اندوری شوگر، بک و است انا ناجوڑی تیٹی اختہ ئس۔ بھارتی میڈیا رپورٹ آتیٹی پاننگانے کہ کورونا نا درمان نا وخت آ اودے است انا دورہ بس، ہرا اونا ساہ ءِ ہلک۔ راحت اندوری کزیت آن زرس مست سوشل میڈیا غا دعا تا خواست کریسس، او پاریسس کہ او ٹوئیٹر آ تینا جانجوڑی نا بابت حوال ترسا کیک۔ راحت اندوری تینا جتا و گچین آ بیان نا سوب آن مچ آ دنیا ٹی شرف نا خواجہ ئس۔ راحت اندوری نا کیہی نظم و شعر ہر بندغ ءِ یات ءُ۔ و اونا شعرک بھارت نا سیاسی جلسہ جلوس آتیٹی چاگڑد ءِ باسفنگ کن کاریم ایترہ۔