حکومت نیب انا کمک اٹ اپوزیشن ءِ اسہ کنڈ کننگ خواہک، مولانا فضل الرحمن

اسلام آباد(آن لائن) جمعیت علماءاسلام نا کماش مولانا فضل الرحمن پاکستان مسلم لیگ( ن) نا راہشون مریم نواز نا گاڈی آ خلکاری نا سخت انگا لوز آتیٹی مذمت ءِ کرسا پارینے کہ حکومت نیب نا کمک اٹ اپوزیشن ءِ دیوال اٹ خلنگ خواہک ولے حکومت نا چٹفنگ کن ننا جہد آک برجا سلرہ او اپوزیشن جماعت آتا بشخ و پانٹ آ اُست ہسونی نا درشانی ءِ کرسا پارینے کہ اپوزیشن نا بھلو جماعت اسے نا سوب آن اوار مننگ اٹ سختی دوئی مننگ اٹی ءِ۔ تدوک آ دے اسلام آباد اٹ پریس کانفرنس کرسا مولانا فضل الرحمن پارینے کہ اینو مریم نواز تون افسوسناک ءُ واقعہ اس پیش بسنے مریم نواز ہراتم احتساب افس ءِ سر مس تو اوڑا آنسو گیس خسنگا و اوڑتون بیدادی کننگا او پارینے کہ مریم نواز کنتون حال احوال کرے و کل حالیت آتیان معلومدار کرے او پولیس گردی نا بابت ویڈیو اس ہم مون آ ایسنے۔ او پارینے کہ خلکاری آن مریم نواز نا بلٹ پروف گاڈی نا شیشہ ہم پنانے، نن سیاست اٹ بیر ہلوک کارروائی نا سخت انگا لوز آتیٹی مذمت ءِ کینہ۔